Astanada qoǵamdyq kólikte jolaqyny Bluetooth arqyly tóleýge bolady

Elordanyń qoǵamdyq kóliginde jolaqyny Bluetooth arqyly tóleýge bolady. Tólemniń bul túrin paıdalaný Avtobys mobıldi qosymshasy arqyly qoljetimdi, dep habarlaıdy Kazinform Astana ákimdiginiń baspasóz qyzmetine silteme jasap. 

Ol úshin Avtobys mobıldy qosymshasyn júkteý, qosymshaǵa telefon nómiri arqyly tirkelý, mobıldy qosymshanyń teńgerimin toltyrý (ámııan batyrmasyn tańdap, usynylǵan ádisterdiń birin tańdaý) qajet.

Qosymshanyń teńgerimin QIWI, kassa24 tólem termınaldary, elektrondyq ámııandar, ınternet-bankıngter arqyly toltyrýǵa bolady.

Jolaqyny Bluetooth arqyly tóleý úshin telefonyńyzdyń Bluetooth qosasyz, qosymshaǵa kirip, Bluetooth belgisin basasyz, marshrýtty tańdaısyz jáne tólemdi rastaısyz.

Aıta ketý kerek, ázirge tólem jasaýdyń bul tásili jolaqysyn tóleýdiń elektrondy júıesiniń jabdyqtarymen jabdyqtalǵan avtobýstarda qoljetimdi.