Astanada qoǵamdyq kólikte jol júrý aqysy 150 teńgege kóterilmek

Elorda ákimdiginiń málimetinshe, qalada qoǵamdyq kólikte jol júrý tarıfi 90 teńge mólsherinde 2014 jyly belgilengen. Ótken 12 jyl ishinde jol júrý aqysy nebári bir ret qaıta qaralyp, búginde 110 teńgeni qurap otyr. 

- Bul rette 2014 jyldan beri tasymaldaýshylardyń negizgi shyǵyndary, atap aıtqanda, janarmaı, qosalqy bólshekter men jańa avtobýstardyń quny, sondaı-aq júrgizýshilerdiń eńbekaqysyna jumsalatyn shyǵyndar aıtarlyqtaı ósti. Máselen, 2014 jyly dızel otynynyń bir lıtri shamamen 107 teńge bolsa, qazirgi ýaqytta onyń baǵasy 329 teńgeni quraıdy. Osylaısha, atalǵan kezeńde dızel otynynyń quny 3 eseden astam ulǵaıdy, - dep atap ótedi ákimdikten.

Taratylǵan málimetke qaraǵanda, júrgizýshilerdiń eńbekaqysyna jumsalatyn shyǵyn da aıtarlyqtaı artty. Máselen, 2014 jyly júrgizýshilerdiń ortasha jalaqysy shamamen 100-150 myń teńgeni qurasa, qazirgi ýaqytta avtobýs klasy men jumys rejımine qaraı 700 myń teńgeden bastalady. Osy kezeńde qosalqy bólshekterdiń, avtomobıl shınalarynyń, akkýmýlıator batareıalarynyń, avtobýstarǵa tehnıkalyq qyzmet kórsetý men jóndeý jumysynyń, sondaı-aq jańa jyljymaly quramdy satyp alý quny da edáýir artty.

- Shyǵynnyń aıtarlyqtaı ósýine qaramastan, elordada qoǵamdyq kólikti kezeń-kezeńimen jańartý jáne damytý jumysy júrip jatyr. Sońǵy úsh jylda tasymaldaýshylar qaýipsizdik, jaılylyq jáne ekologııalyq talaptarǵa saı keletin 1127 jańa jyljymaly quram satyp aldy, - dedi ákimdik.

Degenmen, qalada tegin jol júrý quqyǵy azamattardyń myna sanattaryna beriledi:

1. Ekinshi dúnıejúzilik soǵys qatysýshylary men múgedekteri jáne olarǵa teńestirilgen azamattar;

2. jasy boıynsha jáne eńbek sińirgen jyldary boıynsha zeınetkerler, sondaı-aq zeınet jasyna jetken, jasy boıynsha jáne asyraýshysynan aıyrylýyna baılanysty memlekettik áleýmettik járdemaqy alýshylar;

3. kópbalaly analar;

4. kópbalaly otbasylar;

5. múgedektigi bar adamdar;

6. on segiz jasqa deıingi múgedektigi bar balalar, onyń ishinde olardyń ata-analarynyń (zańdy ókilderiniń) biri;

7. Qazaqstandaǵy 1986 jylǵy 17-18 jeltoqsan oqıǵalaryna qatysýshylar arasynan saıası qýǵyn-súrgin qurbandary, «Jappaı saıası qýǵyn-súrginder qurbandaryn aqtaý týraly» Qazaqstan Respýblıkasynyń Zańynda belgilengen tártippen aqtalǵandar.

Munan bólek, 2020 jylǵy naýryzdan bastap Astanada bilim alatyn 18 jasqa deıingi balalar úshin de jol júrý tegin.

- Sonymen birge Turaqty marshrýttar boıynsha jolaýshylar men bagajdy tasymaldaý jóninde qyzmet kórsetýge tarıfter esepteý ádistemesine sáıkes júrgizilgen esepteýlerge saı, 2026 jyly bir sapardyń ortasha eseptik quny qoldanystaǵy jol júrý aqysynan aıtarlyqtaı joǵary. Paıdalaný shyǵyndarynyń ósýine, qoǵamdyq kóliktiń turaqty jumysyn qamtamasyz etýge, avtobýs parkin odan ári jańartýǵa jáne marshrýttyq jelini damytý qajettiligine baılanysty 1 jeltoqsannan bastap qolma-qol aqshasyz tólem kezinde jol júrý aqysyn 150 teńge mólsherinde belgileý usynylady, - delingen jergilikti atqarýshy organ tarapy jarııalaǵan aqparatta.

Buǵan deıin Astanada kómir qansha turatynyn jáne qaıdan satyp alýǵa bolatynyn jazǵan edik.