Astanada qobyz ben dombyrany biriktiretin akkýstıkalyq júıe tanystyryldy
ASTANA. QazAqparat - QR Táýelsizdiginiń 25 jyldyǵy qarsańynda astanalyq kompanııalardyń biri qazaqtyń dástúrli mýzykalyq aspaptarynyń túrinde akkýstıkalyq júıe oılap tapty. Jańalyqqa jany qumar jandardyń eń birinshi týyndylary dombyra men qobyzdy biriktiretin arnaıy dybys kúsheıtkishter boldy, dep habarlaıdy BNews.kz.
Appazov Design kompanııasynyń jetekshisi Stanıslav Appazovtyń pikirinshe, qazaq halqynyń mádenıeti men dástúrleri sheberlikke toly jáne olar osy elde turyp jatqan barlyq halyqtardikine uqsas.
«Biz daıyndaǵan týyndy bul kezinde kóptegen ulttardy baýyryna basyp, ózi týǵan jerdi olardyń da týǵan ólkesine aınaldyra bilgen halyqtyń mádenıeti men ónerine degen qurmet deýge bolady. Qazaqtardyń uly murasy búginde barlyq qazaqstandyqtar úshin túsinikti. Biz de búgin qalyń kópshiliktiń nazaryna qazaqtyń ult aspaptarynyń zamanǵa sáıkestendirilgen dybys júıesin usynyp otyrmyz. Sońǵy úlgidegi materıaldar men tehnologııalar ulttyq aspaptardy pishini jaǵynan ǵana úılestirip qoımaı, olardy zamanaýı gadjetterge de yńǵaılastyrýǵa múmkindik berip otyr. Ózimizdiń shyǵarmashylyq týyndymyzdy biz Qazaqstan halqyna arnaımyz jáne bolashaqta osy ashyq-jarqyn minezdi halyqtyń arasynan túrli ınnovatsııalyq jáne damyǵan ıdeıalardy birlesip júzege asyrýǵa qoldaý kórsetetin kóptegen azamattar tabylady degen oıdamyz»,-dedi Stanıslav Appazov.
Avtorlardyń aıtýynsha, qazaq aspaptarynyń túrindegi akkýstıkalyq júıe túrli aǵashtardyń suryptarynan jáne plastıkten daıyndalǵan. Onyń ishinde qandaı dybys júıesi bolatyny ázirge belgisiz. Erekshe gadjetti baǵasynyń qandaı bolatyny da ázirge qupııa.
