Astanada kóbinese qandaı kólikter órtenetini anyqtaldy
ASTANA. QazAqparat - Bıyl elordada 134 avtokólik órtendi. Bul týraly búgin baspasóz máslıhatynda Astana qalasy Tótenshe jaǵdaılar departamentiniń resmı ókili Aıagóz Fazylova málim etti, dep habarlaıdy QazAqparat.
«Jalpy órt sanynyń ishinde 23 paıyzy, ıaǵnı 134 oqıǵa avtokólik quraldaryna tıesili. Kólik órtterine elektr symdarynyń qysqa tuıyqtalýy sebep bolýda. Osy oraıda bul kórsetkishte kóbinese jeńil avtokólikter otqa oranǵanyn baıqap otyrmyz, bul rette 113 oqıǵa tirkeldi. Negizinen eski kólikter órtenedi»,-deıdi resmı ókil.
Osy oraıda departament ókilderi aldaǵy ýaqytta kúnniń sýytýyna baılanysty turǵyndardy kólikterdi qyzdyrý kezinde qaýipsizdik sharalaryn saqtaýǵa shaqyrdy.
Belgili bolǵandaı, bıylǵy jyldyń 10 aıynda Astanada 564 órt tirkelip, onyń saldarynan 9 adam (úsheýi balalar) kóz jumdy. Jalpy, keltirilgen shyǵyn somasy 64 mln teńgeden asty. Tilsiz jaý sharpyǵan nysandardyń negizgi úlesi turǵyn úı sektoryna tıesili, sonyń ishinde 62 paıyzy jeke turǵyn úılerde oryn alady.
Jylytý maýsymy bastalǵannan keıin jeke sektorda órt pen ýly gazdan zardap shegý qaýpi artady.
