Astanada qyzylshamen aýyrǵan balalardyń basym bóligi vaktsına almaǵan

ASTANA. KAZINFORM – Astanada qyzylsha aýrýynyń tirkelýi áli de jalǵasyp otyr. Qalalyq sanıtarııalyq-epıdemıologııalyq baqylaý departamentiniń málimetinshe, jyl basynan beri alǵashqy jedel habarlamalar boıynsha 622 jaǵdaı tirkelgen, onyń 403-i zerthanalyq ádispen rastalǵan. 

Elorda ákimdiginiń málimetinshe qyzylshamen aýyrǵandardyń basym bóligi ýaqytyly vaktsına almaǵan balalar.

Qańtar aıynda qyzylsha dıagnozymen 498 bala statsıonarlyq em qabyldaǵan. Qazirgi tańda 85 naýqas emin jalǵastyryp jatyr, onyń ishinde bir bala anestezıologııa, reanımatsııa jáne qarqyndy terapııa bólimshesinde emdelip jatyr.

Epıdemıologııalyq jaǵdaıdy turaqtandyrý maqsatynda elordada qosymsha ımmýndaý jáne qýyp jetý vaktsınatsııasy belsendi júrgizilip jatyr. Sonymen qatar 6 aıdan 10 aı 29 kúnge deıingi balalarǵa jappaı qosymsha vaktsınatsııa uıymdastyrylyp jatyr. Degenmen, 14 jasqa deıingi balalar arasyndaǵy syrqattanýshylyqtyń negizgi úlesi áli de vaktsına almaǵandar arasynda tirkelip otyr. Bul profılaktıkalyq jáne ımmýndaý sharalaryn odan ári kúsheıtý qajettigin kórsetedi.

Qyzylshaǵa qarsy ekpe almaǵan balalarǵa (ekpe jasyna jetpegen, medıtsınalyq qarsy kórsetilimi bar nemese ata-anasynyń bas tartýyna baılanysty vaktsına almaǵan) naýqaspen baılanysta bolǵan sátten bastap 5 kúnnen keshiktirmeı, qoldaný nusqaýlyǵyna sáıkes adam ımmýnoglobýlıni bulshyqetke 0,5 ml/kg mólsherinde, biraq 15 ml-den aspaıtyn kólemde egiledi.

Mamandardyń aıtýynsha, epıdemıologııalyq ahýaldy turaqtandyrý jáne qyzylshanyń aýyr saldarlarynyń aldyn alý úshin eń tıimdi jol – ýaqytyly vaktsınatsııa. 

Aıta ketelik SQO-da epıdmaýsym bastalǵaly 47 myńǵa jýyq adam JRVI-men aýyrǵany týraly jazǵan edik.