Astanada qyzylshaǵa qarsy vaktsına almaǵan balalar josparly túrde aýrýhanaǵa jatqyzylmaıdy

ASTANA. KAZINFORM — Astana qalasynyń Sanıtarııalyq-epıdemıologııalyq baqylaý departamentiniń basshysy qyzylsha aýrýynyń taralýyna tosqaýyl qoıýǵa arnalǵan jańa qaýlyǵa qol qoıdy. Bul rette balalarǵa ekpe salýdyń qosymsha is-sharalary uıymdastyrylmaq. 

— Sońǵy 3 apta ishinde qyzylshanyń 403 rastalǵan jaǵdaıy tirkeldi, 100 myń halyqqa shaqqandaǵy kórsetkish 25,5 boldy. 2026 jylǵy aldyńǵy aptamen salystyrǵanda aýrý juqtyrýdyń 2,8 ese ósýi baıqaldy. Jas erekshelik qurylymy boıynsha naýqastardyń 96 paıyzyn 14 jasqa deıingi balalar, onyń ishinde: 28% — 1 jasqa deıingi, 60% — 1-4 jas aralyǵynda, 6,4% — 5-9 jas aralyǵynda, 1,5% — 10-14 jas aralyǵynda, 1,7% — 15-19 jas aralyǵynda, 2,7% — 20 jastan asqandar, — delingen vedomstvo aqparatynda. 

Qujatta aýrý juqtyrǵandar arasynda 95 paıyzynda (385 jaǵdaı) ekpe saldyrmaǵan balalardy qamtydy. Onyń arasynda vaktsınadan bas tartý sebebinen — 257 jaǵdaı (63,8%), jasyna jetpeýine baılanysty egilmegender — 112 bala (28%), egý múmkindikterin ótkizip alý — 9 jaǵdaı (2%), sondaı-aq medıtsınalyq qarsy kórsetilimder — 7 jaǵdaı (1,8%).

— 18 jasqa deıingi balalar men jasóspirimderdiń qyzylshaǵa qarsy egilý deńgeıine taldaý júrgizip, ata-analardyń (zańdy ókilderiniń) aqparattandyrylǵan kelisimin alǵannan keıin, ekpe almaǵan balalar men jasóspirimderge qosymsha ımmýndaý júrgizý;

— 55 jasqa deıingi medıtsınalyq qyzmetkerler arasynda qyzylshaǵa qarsy egilý mártebesine taldaý júrgizý. Vaktsınatsııasy joq nemese egilý mártebesi belgisiz bolǵan jaǵdaıda, ekpe alatyn adamnyń kelisimin alǵannan keıin, qyzylshaǵa qarsy vaktsınatsııa júrgizýdi qamtamasyz etý;

— Ata-analardyń (zańdy ókilderdiń) kelisimin alǵannan keıin, 6 aıdan 10 aı 29 kúnge deıingi balalarǵa qyzylshaǵa qarsy qosymsha vaktsınatsııa júrgizý;

— 1 jasta jáne 6 jastaǵy nysanaly jas toptaryndaǵy balalardy qyzylsha, qyzamyq jáne parotıtke qarsy profılaktıkalyq ekpelermen qamtýdyń ońtaıly deńgeıine qol jetkizýdi qamtamasyz etý;

— Balalar statsıonarlaryna josparly túrde jatqyzýdy tek qyzylshaǵa qarsy vaktsınatsııanyń bolýy kezinde júzege asyrý.

Aıta keteıik, Astanada qyzylsha aýrýynyń tirkelýi áli de jalǵasyp jatqanyn jazǵan edik.