Astanada Qyzylorda oblysynyń kreatıvti ındýstrııalar jármeńkesi ótip jatyr
ASTANA. KAZINFORM - 12-13 qyrkúıek kúnderi Astanadaǵy Qazaq Creative Hub alańynda respýblıkalyq Creative Aimaq jobasy aıasynda Qyzylorda oblysynyń kreatıvti ındýstrııalar jármeńkesi ótedi, dep habarlaıdy QR Mádenıet jáne aqparat mınıstrliginiń baspasóz qyzmeti.
Jármeńkede zergerlik buıymdar, aǵash pen súıekten jasalǵan zattar, ulttyq mýzykalyq aspaptar, kilemder, dızaınerlik kıimder jáne jergilikti sheberlerdiń basqa da avtorlyq ónimderi qoıylǵan.
Kópshilik olardy tamashalap qana qoımaı, satyp ala alady. Jalpy jármeńkede kreatıvti ındýstrııalardyń 21 baǵyty boıynsha ónimder tanystyrylǵan.
Olardyń jalpy quny 74 mln teńgeni quraıdy. Sonymen qatar Qyzylorda Hub ázirlegen tsıfrlyq jobalar men Qyzylorda oblysynyń zamanaýı medıa bastamalary da kópshilikke usynyldy.
Jármeńke aıasynda «Anaǵa taǵzym» kreatıvti ındýstrııalar ortalyǵynda ázirlengen Syr Style Collection sán toptamasynyń tanystyrylymy ótti.
Toptamada ulttyq naqysh zamanaýı dızaınmen úılesim tapqan. Baǵdarlamada ulttyq qolóner boıynsha sheberlik sabaqtary, kontserttik baǵdarlamalar men sán kórsetilimi de bar.
Jármeńkege kelýshiler «Altyn dombyra», «Kúmis dombyra» sekildi biregeı mýzykalyq aspaptardy jáne óńirdiń kórnekti tulǵalaryna qatysty tarıhı-mádenı jádigerlerdi tamashalaı alady.
Kreatıvti jármeńke Astana qalasy, Joshy han kóshesi, 16/2 mekenjaıy boıynsha saǵat 10:00-den 19:00-ge deıin ótedi. Kirý tegin.
Osyǵan deıin Qyzylordanyń 100-ge jýyq kreatory Astanada bas qosqany týraly jazdyq.
