Astanada Qytaıdyń jibek ónerin tanytatyn halyqaralyq kóshpeli kórme ashyldy
ASTANA. KAZINFORM — Qazaqstannyń Ulttyq mýzeıinde «Keremet jibek: Qytaıdyń zamanaýı jibek óneri» halyqaralyq kóshpeli kórmesiniń saltanatty ashylý rásimi ótti. Joba Qytaıdyń Jibek mýzeıi, Hýchjoý jáne Turpan mýzeılerimen birlesip uıymdastyrylǵan.
Kórmeniń ashylýynda Qazaqstandaǵy Qytaı Halyq Respýblıkasynyń Tótenshe jáne ókiletti elshisi Han Chýnlın órkenıetter arasyndaǵy ózara almasý beıbit damý men yntymaqtastyqtyń negizi ekenin aıtty.
— Órkenıet alýan túrliligimen qundy, ózara almasý arqyly toǵysady, ózara yqpaldastyq arqyly kemeldenip, damýǵa jol ashady. Qytaı usynǵan Jahandyq órkenıet bastamasy álem órkenıetteriniń alýan túrliligin qurmetteýge úndeıdi, — dedi elshi.
Onyń aıtýynsha, Qytaı men Qazaqstan mádenı mekemeler arasyndaǵy baılanysty kúsheıtip, gýmanıtarlyq yntymaqtastyqty odan ári damytýǵa nıetti.
— Qazaqstan Respýblıkasyndaǵy Qytaı Halyq Respýblıkasynyń Elshiligi Qytaı men Qazaqstannyń mádenı mekemeleri arasyndaǵy baılanystardy odan ári nyǵaıtýǵa, sondaı-aq eki eldiń gýmanıtarlyq saladaǵy almasýy men yntymaqtastyǵyn tereńdetýge barynsha qoldaý kórsetip, barlyq qajetti kómekti usynatyn bolady, — dedi Han Chýnlın.
Kórme aıasynda Qytaıdyń dástúrli jibek mádenıeti men zamanaýı jibek ónerin ushtastyrǵan biregeı týyndylar usynyldy.
Ekspozıtsııa kelýshilerdi ejelgi Jibek jolynyń mádenı murasy men qazirgi dızaınerlik sánmen tanystyrady.
Aıta keteıik, búgin Astana kúni qarsańynda ekologııalyq jobalar kórmesi men festıval uıymdastyrylǵan bolatyn.
