Astanada Qytaıdyń Japon basqynshylaryna qarsy jeńisine arnalǵan fotokórme ashyldy
ASTANA. KAZINFORM – Qytaı halqynyń Japon basqynshylaryna qarsy soǵystaǵy jáne Ekinshi dúnıejúzilik soǵystaǵy Jeńistiń 80 jyldyǵyna arnalǵan «Ulttyq táýelsizdik pen álemdegi beıbitshilik úshin» atty fotokórmesi búgin Astanada ashyldy.
Іs-sharany Qytaıdyń Qazaqstandaǵy Elshiligi jáne Qazaqstan Respýblıkasynyń Qorǵanys mınıstrligi birlesip uıymdastyrdy.
Atalǵan fotokórme tórt bólimnen turady jáne jalpy 125 qundy tarıhı sýret qoıylǵan. Kórme fotosýretter men mátinderdi ushtastyra otyryp, Qytaı halqynyń 14 jyldyq janqııarlyq kúresin qaıta jańǵyrtady jáne Qytaıdyń álemdik antıfashıstik soǵystaǵy tarıhı orny men mańyzdy úlesin aıqyndaıdy.
Ashylý saltanatynda QHR Qazaqstan Respýblıkasyndaǵy Tótenshe jáne Ókiletti Elshisi Han Chýnlın sóz sóılep, Qytaı halqynyń fashızmge qarsy kúrestegi tarıhı rólin atap ótti.
— Qytaı Kommýnıstik partııasynyń basshylyǵymen Qytaı álemde eń alǵash bolyp fashızmge qarsy soǵystyń otyn tutatty. 14 jylǵa sozylǵan aýyr shaıqastardan keıin búkil halyqtyń qaharmandyq kúresi arqyly uly Jeńiske qol jetkizildi, — dedi Elshi.
Qazaqstan Qorǵanys ýnıversıtetiniń bastyǵy general-maıor Asqar Mustabekov óz kezeginde Qytaı men Qazaqstan halyqtarynyń fashızmge qarsy soǵystaǵy ortaq tarıhyna toqtaldy.
— 1937 jyldan bastap Qytaı halqy japon basqynshylaryna qarsy janqııarlyqpen kúresti. Segiz jylǵa sozylǵan soǵys mıllıondaǵan adamdardyń ómirin alyp ketti. Halyqtyń tabandylyǵymen qaharmandyǵy Japonııa mılıtarızminiń toqtatýyna yqpal etip, Ekinshi dúnıejúzilik soǵystyń jeńisine úles qosty, — dedi ol.
Sonymen qatar ol Qazaqstan halqynyń da osy tarıhı kúreske belsene qatysqanyn atap ótti.
— Sol kezeńde Keńes Odaǵynyń quramynda bizdiń jerlesterimiz Qıyr Shyǵys maıdanyna attanyp, myńdaǵan qazaqstandyq sarbaz 1945 jylǵy tamyzdaǵy Manchjýrııa operatsııasyna qatysty. Olar Japon Kvantýn armııasyn talqandaýǵa qatysyp, Azııadaǵy soǵysty aıaqtaýǵa úlken úlesterin qosty, — dedi general-maıor.
