Astanada qytaı tilinen álemdik baıqaýdyń respýblıkalyq kezeńi ótip jatyr
ASTANA. KAZINFORM — Astanada qytaı tilinen álemdik baıqaýdyń respýblıkalyq kezeńi bastaldy. El óńirlerinen iriktelip kelgen qatysýshylar bul synnan ótse, halyqaralyq kezeńge joldama alady.
Mektep oqýshylary men stýdentter arasyndaǵy búkilálemdik «Qytaı tili kópiri» baıqaýynyń Qazaqstan boıynsha aqtyq kezeńi elordadaǵy Eýrazııa ulttyq ýnıversıtetinde ótip jatyr.
— QHR tóraǵasy Sı Tszınpın men QR Prezıdenti Qasym-Jomart Toqaevtyń strategııalyq basshylyǵynyń arqasynda qytaı-qazaq qatynastary jan-jaqty strategııalyq áriptestiktiń jańa bıigine kóterildi, jańa «altyn otyz jyldyqtyń» bastalýyna jol ashty. Eki el arasyndaǵy ekonomıka, saýda, ǵylym men tehnologııa, bilim berý, mádenıet salalaryndaǵy yntymaqtastyq qarqyndy damyp keledi. Qytaı men Qazaqstan arasyndaǵy strategııalyq áriptestik tereńdeı túsken saıyn, qytaı tilin meńgergen jáne Qytaıdy jaqsy biletin sizder, jastar, eki el arasyndaǵy yntymaqtastyqtyń kópiri, baılanystyrýshy býyny jáne jańa kúshi bolasyzdar, — dedi baıqaýdyń ashylýynda sóz sóılegen QHR-dyń Qazaqstandaǵy elshisi Han Chýnlın.
Baıqaý buǵan deıin oblystar men qalalarda ótip, respýblıkalyq kezeńge 30 oqýshy, 30 stýdent joldama alǵan. Al búgingi synnan ótken 2 oqýshy men 2 stýdent Qytaıda ótetin fınaldyq kezeńge joldama alady.
— Baıqaýda úsh túrli tapsyrma bolady. Birinshisi — test, onda qatysýshynyń Qytaı tilin, mádenıetin, geografııasyn jáne Qazaqstanmen baılanysyn qanshalyqty biletini anyqtalady. Ekinshisinde qatysýshy óziniń Qytaı álemimen qalaı tanysqanyn baıandap, esse jazady. Úshinshisinde óziniń bir ereksheligin, ónerin kórsetedi, — deıdi Konfýtsıı ınstıtýtynan tájirıbeden ótýshi ári Eýrazııa ulttyq ýnıversıtetiniń stýdenti Anastasııa Lıforova.
Baıqaýda «eń talantty» degen de atalym bar eken. Ol baıqaýdan oryn almaǵan, biraq ónerimen jurtty tańǵaldyrǵan qatysýshyǵa beriledi.
Aıtýly synǵa baq synaǵaly kelgenderdiń biri — Abylaı han atyndaǵy Qazaq halyqaralyq qatynastar jáne álem tilderi ýnıversıtetiniń 3-kýrs stýdenti Araılym Jaqsylyqqyzy. Ol Kazinform agenttigine óziniń qytaı tilin úırený barysyndaǵy azǵantaı jetistigimen bólisti.
Baıqaý búgin keshke aıaqtalyp, jeńimpazdarǵa joldama úlestiriledi.
Buǵan deıin Ulttyq ýnıversıtetterde qytaı tilin oqytatyn kafedralar qurylatyny belgili boldy.