Astanada Qytaı sheberleri jibekten toqyǵan kıimderdiń sán úlgisi kórsetiledi

ASTANA. KAZINFORM — Elordadaǵy Ulttyq mýzeı Qytaıdyń Hanchjoý qalasyndaǵy Ulttyq jibek mýzeıimen 5 jyldyq memorandýmǵa otyrmaqshy. 

Bul týraly Qytaı ulttyq jibek mýzeıi dırektorynyń orynbasary Chjan Chenmın astanada ótip jatqan «Uly Jibek joly: Mádenıetter dıalogy» atty halyqaralyq ǵylymı konferentsııada aıtty.

— Qytaı ulttyq jibek mýzeıi Chjetszıan provıntsııasynyń Hanchjoý qalasynda ornalasqan. Bul Qytaıdyń ońtústik-shyǵysyndaǵy iri toqyma jáne jibek mýzeıi bolyp esepteledi. Búgingi konferentsııa Qazaqstan-Qytaı týrızmi aıasynda ótip otyr.

«Jibek pen Jibek joly: Qytaıdan — Qazaqstanǵa deıin» dep atalatyn kórme ákelip otyrmyz. Kórmeden bólek sala sarapshylary, qolónershiler, ǵalymdar pikir almasyp, tájirıbe bólisetin konferentsııa ótip jatyr, — dedi BAQ ókilderine bergen suhbatynda.

Aıtýynsha, atalǵan mýzeı osydan 15 jyl buryn Astanada alǵash ret kórme uıymdastyrǵan eken.

— Al bıylǵy kórme Qazaqstanda biz ótkizgen eń aýqymdy kórme bolyp otyr. Óıtkeni osyndaǵy Ulttyq mýzeı bizge 1000 sharshy metrden astam alań usynyp otyr. Mýzeı qonaqtarynyń nazaryna 145-ten astam eksponat qoıýǵa múmkindik aldyq. Kórmeniń syrtynda osy jerde jibek kıimderdiń sán úlgisin pash etemiz.

Budan bólek Ulttyq mýzeımen memorandýmǵa qol qoımaqshymyz. Onyń aıasynda aldaǵy 5 jylda jyl saıyn Ulttyq mýzeıge kelip kórme ótkizip otyramyz, — dedi Chjan Chenmın.

Buǵan deıin Ulttyq mýzeı Italııadaǵy restavratsııa ınstıtýtymen áriptestik ornatatynyn jazǵan edik.