Astanada kitapqumar qaýym men sýret ónerin baǵalaıtyndarǵa arnalǵan kesh ótti
ANA. Qazannyń 23-i. QazAqparat /Gúlmıra Álıakparova/ - Qazannyń 22-si kúni, keshqurym elordadaǵy «Astana» (Interkontınental) qonaqúıinde Irına Serkebaevanyń «Orta jastyń kúızelisi (shyntýaıtynda joq)» atty kitabynyń tanystyrylymy jáne tanymal qazaqstandyq sýretshiler Balnur Asanovanyń,
Gúljamal Tágenovanyń jáne Vladımır Grıgorıannyń eńbekteri qoıylǵan kórme ashyldy, dep habarlaıdy QazAqparat.
2001 jyldan beri Amerıka Qurama Shtattarynda turatyn I.Serkebaeva osydan eki jyl buryn qazaqstandyq jurtshylyqtyń nazaryna «Ákesiniń erke qyzynyń hıkaıalary» kitabyn usynǵan bolatyn. «Orta jastyń kúızelisi (shyntýaıtynda joq)» kitaby, 2007 jyldan beri jazýshynyń jáne onyń jaqyndarynyń basynan ótken oqıǵalar, sondaı-aq olardyń ishki tolǵaýlary men kúızelisteri negizinde jazylǵan 22 áńgimeden quralǵan. Al aldaǵy ýaqytta oqyrmandar I.Serkebaevanyń óziniń ákesi, álemge tanymal barıton Ermek Serkebaev týraly jazǵan kitabyn oqıtyn bolady.
Avtordyń aıtýynsha, jınaqqa engen áńgimelerdiń basty taqyryby - áıelder, olardyń psıhologııasy, ishki jáne syrtqy sulýlyqtarynyń úılesimdigi jáne kerisinshe, úılespeýshiligi. «Orta jastaǵy adamdardyń kúızelisi bolmaıdy. Bul tek adamnyń ózin-ózi soǵan sendirýi. Ózińe qandaı kózqarasta bolsań, aınalańdaǵylar seni solaı qabyldaıdy», deıdi ol.
Avtordyń bul sózin, keshti ashqan QR Parlamenti Májilisiniń depýtaty Gúljan Qaraǵusova da quptap, «kúızelis - adamnyń ishki dúnıesinde mahabbattyq sezimderge oryn qalmaǵan kezde ǵana bastalady», degen oıyn bildirdi.
Kitapqa engen áńgimelerdiń taqyrybyn odan ári asha túsip, tolyqtyrý úshin shyǵarmaǵa tanymal sýretshi, «Symbat» sán úıiniń dızaıner-modeleri Balnur Asanovanyń birqatar týyndylary engizilgen. B.Asanova sondaı-aq kitap muqabasy dızaınynyń avtory.
Keshke kelýshiler B.Asanovanyń, atalmysh «Symbat» sán úıine tıesili Sán akademııasynyń ustazdary bolyp tabylatyn Gúljamal Tágenova men Vladımır Grıgorıan sýretteriniń kórmesin tamashalaı aldy.
B.Asanovanyń «Qalalardaǵy kúz», «Tereze aldyndaǵy gúl», «Túngi qala» jáne qoıylǵan basqa da barlyǵy 20-ǵa jýyq sýreti adamdardyń ishki dúnıesin kórsetýge baǵyttalǵan bolsa, V.Grıgorıannyń «Jabaıy júzim», «Solomeı bıi» jáne basqa da (barlyǵy 13 sýret) týyndylary natıýrmort, peızaj jáne portret janrynda salynǵan. Al G.Tágenova óziniń «Syǵan qyzdar», «Túngi qala», «Gúl», «Qalyńdyq» atty (23 sýret) eńbekterinde ashyq ári qanyq tústi boıaýlarmen qazaq qyzdarynyń obrazdaryn, kún nuryn, sýdyń aǵysy men aýanyń qozǵalysyn beıneleýge tyrysqan.
