Astanada kitaphanashylar, sýretshiler jáne polıtseılerdiń aılyǵy ósti

NUR-SULTAN. QazAqparat - Nur-Sultanda birqatar kommýnaldyq mekeme qyzmetkerleriniń jalaqysy ósti. Bul jaıynda qala ákimi Altaı Kólginov málim etti, dep habarlaıdy QazAqparat.

«Qyzmetkerlerdiń eńbek jaǵdaıyn júıeli túrde jaqsartýdy ary qaraı jalǵastyramyz. 1 maýsymnan bastap áleýmettik, mádenıet (kitaphanalar, murajaılar), sport, jergilikti polıtsııa qyzmeti jáne basqa mamandarynyń jalaqysy kóterildi. Osylaısha elorda mekemelerinde jumys isteıtin 4 myńǵa jýyq maman qamtyldy. Máselen áleýmettik mekemeler, medıtsınalyq-ońaltý ortalyqtary, kitaphana jáne basqa oryndarda jumys isteıtin, jalaqysy tómen qyzmetkerlerdiń eńbekaqysy 30%-dan 50%-ǵa deıin kóbeıdi» dep jazdy ákim Instagram paraqshasynda.

Osyǵan baılanysty ol birneshe mysal keltirip ótti.

Mysaly «Januıa» otbasy ınstıtýtyn qoldaý ortalyǵy jáne «Belsendi uzaq ómir súrý ortalyǵy» áleýmettik qyzmetkerlerdiń jalaqysy 1,5 ese ósken.

Al kitaphanashylardyń jalaqysy 30%-dan asa («Ortalyq kitaphana júıesi» KMM), sýretshilerdiń jalaqysy 50%-ǵa ósti.

Jergilikti polıtsııa qyzmetiniń jalaqysy 30%-ǵa deıin kóterildi, azamattyq qyzmetkerler (S, D sanattary jáne razrıadtaýshylar) 1,8 ese ósti.

«Memleket basshysynyń tapsyrmasy boıynsha osyǵan deıin medıtsına qyzmetkerleriniń, pedagogtardyń, kommýnaldyq kásiporyn qyzmetkerleriniń jalaqysy kóterilgen bolatyn. Osy baǵyttaǵy jumysty ary qaraı da jalǵastyramyz» deıdi Altaı Kólginov.