Astanada qysta qandaı erekshe demalys oryndary ashylady
ASTANA. KAZINFORM — Qys mezgilinde Astanada turǵyndardyń belsendi demalýyna múmkindik artady. Qala aýdandarynda muz aıdyndary ashylyp, syrǵanaqtar men túrli qysqy oıyn-saýyq oryndary jumys isteıdi, dep habarlaıdy elorda ákimdiginiń resmı saıty.
Qys mezgilinde Astana turǵyndary men qonaqtary úshin belsendi demalatyn oryndar kóbeıedi. Elorda aýdandarynda muz aıdyndary ashylyp, syrǵanaqtar men túrli qysqy oıyn-saýyq alańdary jumys isteıdi.
Qysta serýendep, demalýǵa bolatyn oryndardyń biri — Esil ózeniniń jaǵalaýy
Sondaı-aq Saryarqa aýdanynda, sonyń ishinde Oqýshylar saraıynyń mańynda muz aıdyndary ashylady. Budan bólek, aýdanda 13 muz syrǵanaǵy salynady. Qysqy demalys oryndary «Kóktal» saıabaǵynda, «Oqjetpes» gúlzarynda jáne basqa da qoǵamdyq oryndarda uıymdastyrylady.
Elordadaǵy eń erekshe qysqy oryndardyń biri — Esil aýdanynda, Abu Dhabi Plaza kesheniniń mańynda ashylatyn Astana Winter Park. Bul — uzyndyǵy 1,4 shaqyrym bolatyn aýqymdy muz aıdyny.
Muz jabynynyń jalpy aýdany shamamen 6 myń sharshy metrdi quraıdy. Ádettegi muz aıdyndarynan ereksheligi — munda sheńber boıymen syrǵanap qana qoımaı, uzyn muz jolymen serýendeýge bolady.
Kelýshilerge qolaıly jaǵdaı jasaý úshin jyly pavılondar, konkı jalǵa berý oryndary, otbasylyq demalys aımaqtary men sándik jaryqtandyrý qarastyrylǵan. Muzdy arnaıy júıe arqyly salqyndatyp otyrýdyń arqasynda kún jyly kezde de muz aıdyny jumys isteı alady.
Saraıshyq aýdanyndaǵy qysqy demalys oryndarynyń biri — «Qazaq eli» alańy
Munda muz aıdynyn ashý josparlanyp otyr. Taǵy eki muz aıdyny Júrgenov kóshesinde jáne Prezıdenttik saıabaqta ashylady.
Elordadaǵy taǵy bir qyzyqty qysqy demalys orny — Almaty aýdanyndaǵy Triathlon Ice Par
Trıatlon saıabaǵynda aýdany 1 200 sharshy metr bolatyn zamanaýı muz aıdyny salynyp jatyr. Munda Astana turǵyndary men qonaqtary kún salystyrmaly túrde jyly bolǵan kezde de belsendi demala alady
Arnaıy tońazytqysh jabdyqtary men muzdy saqtaý tehnologııasynyń kómegimen alań aýa temperatýrasy sál jylynǵan kezde de jumysyn jalǵastyra alady.
Kelýshilerge konkı jalǵa berý qyzmeti, jylynyp demalatyn oryn, ystyq sýsyndar men tamaqtaný oryndary qarastyrylǵan. Al sándik jaryqtar muz aıdynyna erekshe kórik berip, keshki serýen men otbasylyq demalysqa qolaıly jaǵdaı jasaıdy.
Almaty aýdanynda da qysqy demalys oryndary ashylady. Atap aıtqanda, «Qumyra» aýmaǵynda, «Jeruıyq» jáne «Jastar» saıabaqtarynda arnaıy alańdar ashý josparlanǵan.
Baıqońyr aýdanynda «Atatúrik» saıabaǵy men «Jastar» saraıynyń mańynda muz aıdyndary ázirlenip jatyr. Sonymen qatar Óndiris, Kirpishti, Qazqalashyq turǵyn alaptarynda jáne Qoıandy saıajaı alabynda da syrǵanaqtar ornatylady. Barlyǵy toǵyz oryn qamtylmaq.
Qysqy demalysqa arnalǵan taǵy bir oryn Nura aýdanynda ashylady. Muz aıdynyn «Astana Arena» stadıonynyń mańynda jabdyqtaý kózdelgen.
Qazir elordadaǵy qoǵamdyq keńistikterdi qysqy maýsymǵa daıyndaý jumysy júrip jatyr. Atalǵan muz aıdyndary men syrǵanaqtar — bıyl Astana turǵyndary men qonaqtary úshin ashylatyn qysqy demalys oryndarynyń bir bóligi ǵana. Qazir qalanyń ózge aýdandarynda da osyndaı alańdardy daıyndaý jumysy júrip jatyr.
Tabıǵı muz quıý jumysy kún salqyndaǵannan keıin bastalady. Qosymsha demalys oryndary men olardyń qashan ashylatyny týraly aqparat daıyndyq jumysy aıaqtalǵan saıyn jarııalanyp otyrady.
Osylaısha, bıyl qysqy demalys tek qalanyń ortalyq bóliginde ǵana emes, turǵyn alaptarda da uıymdastyrylady. Bul turǵyndarǵa alysqa barmaı-aq, úıiniń mańynda taza aýada serýendep, belsendi demalýǵa múmkindik beredi.
