Astanada qysqy jylytý maýsymyna jylý qory daıyn
ASTANA. KAZINFORM — Astanada qoldanystaǵy jylýmen jabdyqtaý nysandaryn qysqa daıyndaý jumystary aıaqtalyp keledi. Sonymen qatar jylý kózderin jańǵyrtý jáne jańa nysandar salý jobalary júzege asyrylyp jatyr. Bul týraly qala ákimdiginiń resmı saıty habarlady.
Búginde qalanyń ortalyqtandyrylǵan jylýmen jabdyqtaý júıesine bes negizgi energııa kózi kiredi. Olar — JEO-1, JEO-2, JEO-3, «Turan» jáne «Ońtústik-Shyǵys» gaz jylý stantsııalary.
— Jylý qýatynyń rezervi aldaǵy jylytý kezeńinde qalanyń qajettiligin qamtamasyz etýge jáne júkteme artqan jaǵdaıda qosymsha qor qalyptastyrýǵa múmkindik beredi. Sonymen qatar Astana turǵyndarynyń ósýi men qalanyń qarqyndy damýyn eskere otyryp, jylý qýatyn arttyrý jumysyn jalǵastyryp jatyr, — dep habarlady qala ákimdigi.
Qazir JEO-3-tiń kómirmen jumys isteıtin bóliginiń qurylysy, sondaı-aq JEO-2 sý jylytý qazandyǵyn keńeıtý jáne qaıta jańartý jumysy jalǵasyp jatyr. Bul joba aıasynda № 7 jáne № 8 qazandyqtar ornatylady.
Jańa negizgi nysandardyń biri — qýaty saǵatyna 620 Gkal bolatyn «Telman» gaz jylý stantsııasy. Ony bıyl paıdalanýǵa berý josparlanǵan.
— Jańa jylý kózi jylý qýatynyń rezervin odan ári arttyryp, elordany jylýmen jabdyqtaý júıesiniń senimdiligin kúsheıtedi. Osylaısha, Astanada qysqy jylytý maýsymyna qajetti jylý qýatynyń rezervi daıyn, aldaǵy kezeńge qosymsha rezervter qalyptastyrý jumysyn qatar júrgizip jatyr. Bul qoldanystaǵy turǵyn úı qurylystaryn, sondaı-aq elordanyń damý qarqynyna qaraı jańadan boı kóterip jatqan aýdandardy turaqty ári senimdi jylýmen qamtamasyz etýge múmkindik beredi, — dep habarlady qala ákimdigi.
Eske salaıyq, munyń aldynda jylytý maýsymynda qandaı qaýipsizdik erejelerin qaperden shyǵarmaý qajet ekenin jazǵanbyz.
