Astanada qysqy sport túrlerine arnalǵan biryńǵaı mektep qurylady
ASTANA. KAZINFORM — Elordada birneshe sporttyq baǵytty bir basqarý júıesine biriktirip, sportshylardy bastapqy daıyndyqtan ulttyq qurama deńgeıine deıin tıimdi daıyndaýǵa múmkindik beretn mektep qurylmaqshy. Bul týraly Astana qalasynyń ákimidigi málim etti.
Biryńǵaı mektep qurýdaǵy maqsat:
• qysqy sport túrleri boıynsha biryńǵaı daıyndyq ortalyǵyn qalyptastyrý;
• kadrlyq, qarjylyq jáne materıaldyq resýrstardy shoǵyrlandyrý;
• oqý-jattyǵý úderisiniń sapasyn jáne sportshylardyń básekege qabilettiligin arttyrý;
• mekemeler qurylymyn qysqy olımpıadalyq sport túrlerin damytý basymdyqtaryna sáıkestendirý.
Ákimdiktiń málimetinshe, jyl sońyna deıin Ortalyq saıabaqta jańa zamanǵa saı shańǵy bazasynyń qurylysy aıaqtalady. Jańa keshende túrli deńgeıdegi shańǵyrollerlik joldar, kıim aýystyratyn jyly bólmeler, ınventar daıyndaý bólmeleri, jattyqtyrýshylar men ádiskerlerge arnalǵan arnaıy kabınetter bolady. Budan bólek, «Qazaqstan» sport saraıynyń qurylysy da bastaldy, bul qysqy sportpen aınalysýǵa qoljetimdi ortany keńeıtýdegi mańyzdy qadam.
— Mańyzdysy — engizilip jatqan ózgerister kadrlyq qysqartýǵa ákelmeıdi: barlyq jattyqtyrýshy óz jumys oryndaryn saqtap, balalarmen tolyq rejımde jumysyn jalǵastyra beredi. Oqý-jattyǵý protsesi de burynǵy kólemde júrgiziledi, — delingen habarlamada.
Ákimdiktiń dereginshe, ata-analar úshin alańdaýǵa esh negiz joq. Jattyǵý qalypty kestege saı júrgiziledi, baǵdarlamalar qoljetimdi kúıinde qalady. Qysqy sport túrlerin bir mektepke biriktirý jas sportshylardyń daıyndyq sapasyn arttyrýǵa múmkindik beredi.
Eske sala keteıik, buǵan deıin Hamarda (Norvegııa) konkımen júgirýden álem kýbogynyń sońǵy irikteý kezeńi ótkenin jazdyq.