Astanada qysqa merzimdi oqytý men granttar beriledi
ASTANA. KAZINFORM – Elordada jumyspen qamtýdy arttyrý maqsatynda qysqa merzimdi kásiptik oqytý men kásipkerlikti qoldaý sharalary júzege asyrylyp jatyr. Bul týraly Astana qalasy ákimdiginiń «Eńbek mobıldiligi ortalyǵy» KMM dırektory Omar Oljas málimdedi.
Onyń aıtýynsha, azamattarǵa suranysqa ıe daǵdylardy qysqa merzimde meńgerýge múmkindik beretin oqytý baǵdarlamalaryna basymdyq berilip otyr.
– Qysqa merzimdi kásiptik oqytý 1 aıdan 6 aıǵa deıin sozylady. Oqytý oqý ortalyqtarynda da, jumys berýshilerdiń ótinimi boıynsha tikeleı jumys oryndarynda da uıymdastyrylady, – dedi ol.
Spıkerdiń sózinshe, oqý ortalyqtarynda oqıtyn azamattardyń shyǵyny memleket esebinen óteledi.
– Bul jaǵdaıda qatysýshylarǵa 43 574 teńge kóleminde shákirtaqy tólenedi, al jumys ornynda oqyǵandar 86 500 teńge jalaqy alady, – dedi ortalyq basshysy.
Sonymen qatar oqytý protsesine zamanaýı tásilder engizilip jatyr.
– Qazirgi tańda VR tehnologııalary qoldanylyp, óndiristik úderisterdi modeldeýge múmkindik berilip otyr. Bul mamandardy daıarlaý sapasyn arttyrýǵa yqpal etedi. Oqytý dánekerleý, kondıterlik, tokarlyq, slesarlyq is, sondaı-aq eńbekti qorǵaý jáne qaýipsizdik tehnıkasy baǵyttary boıynsha júrgiziledi, – dedi ol.
Onyń aıtýynsha, jumyspen qamtý sharalary kásipkerlikti qoldaýmen qatar júzege asyrylyp jatyr.
– 2026 jyly áleýmettik osal toptarǵa jańa bıznes-ıdeıalardy iske asyrý úshin 260 memlekettik grant berý josparlanǵan. Grant kólemi 400 aılyq eseptik kórsetkish, ol qaıtarymsyz negizde usynylady, – dedi ol.
Aıta keteıik, elordada 7,5 myńnan astam jańa jumys orny ashyldy.
