Astanada kishkentaı qyzyn eldiń kózinshe uryp-soqqan 52 jastaǵy áıel jazalanady
Búgin áleýmettik jelide kishkentaı qyzdyń basyn máshınege soqqan áıeldiń vıdeosy tarady.
Áýeli áıel «Mama, men jumys isteımin» dep shyrqyrap jylaǵan jalańaıaq qyzdy súırep kólikke mingizedi. Sosyn kólikten shyǵaryp, qyzdyń basyn janynda turǵan kólikke soqty.
Osyǵan qatysty Astana qalasy boıynsha bala quqyǵyn qorǵaýshy ombýdsmen Ásıma Bımendına túsinik berdi.
«Áleýmettik jelini monıtorıngteý kezinde beımálim áıeldiń kámeletke tolmaǵan qyz balaǵa qol jumsaǵany túsip qalǵan vıdeo tabyldy. Tekserýden keıin bular 52 jastaǵy áıel men onyń 10 jasar qyzy ekeni belgili boldy. Oqıǵanyń sebebi - qyz jattyǵyp jatqan jerinen úıine ketkisi kelmegen» delingen ýákil usynǵan málimette.
Qalalyq polıtsııa departamentiniń aqparatyna qaraǵanda bul is Almaty aýdandyq polıtsııa bóliminde Ákimshilik quqyq buzý kodeksiniń 127-babymen tirkelgen.
Atalǵan bap aıasynda 10 nemese 15 AEK kóleminde aıyppul salý nemese bes táýlikke qamaý jazasy qarastyrylǵan.
