Astanada kishkentaı Aıkúnimniń emine qarajat jınaý úshin qaıyrymdylyq kontserti ótedi
Aıkúnim leıkemııaǵa şaldyqqan. Dıagnozdy oǵan sheteldik dárigerler qoıypty jáne em-domyna 210 myń AQSh dollaryn suratqan.
«Qyzymyzdyń emdeýge aı saıyn bizde 25 myń dollar ketedi. Bizdiń basymyzda baspanada joq, sondyqtan halyqtan kómek surap otyrmyz. Osy aralyqta biz 100 myń AQSh dollaryn jınap úlgerdik, kontsert qalǵan somany tolyq jınap bere almasy anyq, biraq qomaqty qarjy jınalsa, ol da úlken kómek bolar edi», - deıdi Aıkúnimniń anasy.
Onyń sózinshe, jalpy osyndaı 10 shara ótkizý josparda bar.
«Birinshi kontsertti biz Kongerss-hollda 16 mamyrda ótkizdik, ol bizge shamamen 5,3 myń dollar jınaýǵa múmkindik berdi. Kontsertten bólek, túrli jármeńkeler ótkizemiz, ózge de sharalar uıymdastyrylyp jatyr. Eger árbir shara 1 000 nemese 5 000 AQSh dollaryn túsiretin bolsa, qajetti soma bir aıda jınalyp qalar edi», - dep úmittenedi ol.
Onyń sózinshe, Astana jurtyn kontsertterge tartý óte qıyn. Bılet pen afıshalardy óz qarajatyna basyp shyǵarý kerek. Ol da qyrýar aqsha turady. Qarajat azdyq etkendikten, Aıkúnimniń ata-anasy kontsertti afıshalar jabystyrý jáne áleýmettik jelilerdegi habarlandyrýlar arqyly jarnamalaıdy.
«Afıshalardy men balamen birge tańǵy 4-ke deıin jabystyramyn, sebebi ákemiz sheteldegi aýrýhanada Aıkúnimniń janynda jatyr. Bizge eriktiler kómektesedi. Sonymen qatar biz taǵy bir qıyndyqqa tap boldyq, 1 600 bılet kassada eki aptadan beri jatyr, áleýmettik jelilerde belsendi jarnamalap jatsaq ta, osy kúnge deıin satylǵany - 2 bılet. 16 mamyrdaǵy kontserttiń bastalýyna eki kún qalǵanda, biz barlyq mektepterdi, emhanalardy aralap shyqtyq. Osy eki kúnde 1 200 bılet sattyq», - deıdi ol.
Qamkóńil ananyń sózinshe, áleýmettik jelilerdegi alaıaqtardyń kóptiginen adamdar shyn qınalǵan adamdarǵa sene bermeıdi.
«Men balamnyń qandaı aýrýǵa shaldyqqanyn aıtyp, kózime jas alǵan kezimde ǵana bir nátıje bolady. áleýmettik jelilerdegi habarlamalarymyzǵa adamdar kóńil bólmeıdi, sebebi alaıaqtar kóp bolyp ketken, adamdarda senim joq», - deıdi Aıkúnimniń anasy.
Kishkentaı búldirshinniń anasy ózgeniń qaıǵysyna ortaqtasyp, kómek qolyn sozǵan jandarǵa alǵysyn bildirdi. Onyń ishinde «Qazaqstan» RTRK» AQ basshysy Erlan Karın de bar. Ol Aıkúnimniń emine qajetti qarajatty jınaý úshin kontsert uıymdastyrýǵa kómektesip qana qoımaı, óziniń Feısbýktegi paraqshasynda shara jóninde habarlama taratty.
«Erlan Karın qazaqstandyq estrada juldyzdaryn atalmysh kontsertte óner kórsetýge shaqyrdy. Ol tipti ánshilerge habarlasýǵa kómektesip, kóptegen ártisti tartqan adamdy berdi», - dep atap ótti ol.
Kontsert 30 mamyrda «Kazmedıa» ortalyǵynda 19.00 saǵatta bastalady. Barlyq saýaldar boıynsha Aıkúnimniń anasyna myna telefon nómiri arqyly habarlasýǵa bolady: 8 702 260 5317.
