Astanada kishi ǵylym Akademııasy quryldy
ASTANA. QazAqparat - Elordadaǵy №82 «Daryn» mamandandyrylǵan lıtseıi men «Máskeý bolat jáne qorytpa ınstıtýty» (MISıS) ulttyq zertteý tehnologııalyq ýnıversıteti eki jaqty memorandýmǵa qol qoıdy, dep habarlaıdy QazAqparat.
Memorandým aıasynda qos tarap «Daryn» lıtseıi bazasynda kishi ǵylym Akademııasyn qurýǵa ýaǵdalasty.
«Máskeý bolat jáne qorytpa ınstıtýty kishi ǵylym Akademııasyn qajetti materıaldyq-tehnıkalyq quraldarmen jabdyqtaýdy óz moınyna alyp otyr. Akademııa daryndy balalardy ǵylymı-zertteý jumysqa jumyldyrý, olardyń shyǵarmashylyq qabileti men tanymdyq belsendiligin arttyrý, mamandyǵyn sanaly túrde tańdaýǵa septesý sııaqty birneshe maqsatty kózdeıdi. Joba aıasynda ǵylymı-zertteýge yntalanǵan jas bilimpazdar birlestikteri qurylyp, ǵylymı-praktıkalyq konferentsııalar, baıqaýlar men olımpıadalar ótedi. Sondaı-aq, arnaıy dárister, testileý, oqýshylardyń bilim deńgeıin kóteretin semınarlar uıymdastyrylady», - delingen Daryn mektebiniń baspasóz qyzmeti jibergen habarlamada.
«Máskeý bolat jáne qorytpa ınstıtýty» Ulttyq zertteý tehnologııalyq ýnıversıteti - álemdegi irgeli ǵylymı-bilim berý ortalyqtarynyń biri. Qurylǵanyna bıyl 100 jyl tolyp otyrǵan iri oqý ordasynyń quramynda 9 ınstıtýt bar. 2015 jyly ashylǵan «Daryn» lıtseıinde qazirde jaratylystaný-matematıkalyq baǵyttaǵy pánderdi tereńdetip oqıtyn 615 oqýshy bilim alady. 
