Astanada qys mezgilinen keıin sanıtarlyq tazalaý jumysy júrip jatyr
ASTANA. KAZINFORM – Astana qalasynyń ákimi Jeńis Qasymbek Instagram-daǵy paraqshasynda elordada aýqymdy sanıtarlyq tazalaý jumysy júrip jatqany týraly jazdy, dep habarlaıdy elorda ákimdiginiń resmı saıty.
– Qalada qys mezgilinen keıingi aýqymdy sanıtarlyq tazalaý jumysy júrip jatyr. Elordadaǵy barlyq aýdanda kópirler, joldar, trotýarlar, qorshaýlar, jol belgileri jáne qalanyń ózge de ınfraqurylymdary jýylyp, tazartylyp jatyr. Sol sııaqty aýlalarda, gúlzarlar men saıabaqtarda jóndeý-qalpyna keltirý jumysy júrgizilip jatyr, olardyń arasynda jasyl jelekterdi butaý da qamtylǵan, - dedi aımaq basshysy.
Qala ákimi sondaı-aq qalalyq kógaldandyrýda 1 mıllıonnan astam jasyl jelek otyrǵyzylǵanyn atap ótti.
– Aýa raıy jylynǵan kezde qalany abattandyrý jáne kógaldandyrý, joldardy jóndeý men salý jumysy qarqyn alady. Ótken jyly 170 aýla men qoǵamdyq keńistik abattandyrylyp, 1 mıllıonnan astam jasyl jelek (kóshetter, butalar, aǵashtar) otyrǵyzyldy. Bıyl da sol qarqyndy saqtap qalýdy josparlap otyrmyz, - dep jazdy Jeńis Qasymbek.
Buǵan deıin Astanada birqatar turǵyn úıge gaz berý ýaqytsha toqtatylatynyn habarlaǵanbyz.
