Astanada Kıpr Respýblıkasynyń elshiligi ashyldy
ASTANA. KAZINFORM — Kıpr Respýblıkasy Prezıdenti Nıkos Hrıstodýlıdıstiń Qazaqstan Respýblıkasyna alǵashqy resmı sapary aıasynda Astanada Kıpr Respýblıkasy elshiliginiń saltanatty ashylý rásimi ótti.
Bul oqıǵa Qazaqstan men Kıpr arasyndaǵy ekijaqty qatynastardyń damýyndaǵy mańyzdy beles boldy.
Qazaqstandaǵy Kıpr elshiligi – Nıkosııanyń Ortalyq Azııadaǵy alǵashqy dıplomatııalyq ókildigi. Bul qadam Qazaqstannyń óńirdegi Kıprdiń mańyzdy seriktesi retindegi róliniń artyp kele jatqanyn kórsetedi ári saýda-ekonomıkalyq jáne ınvestıtsııalyq yntymaqtastyqty keńeıtý úshin qosymsha múmkindikter ashady.
Saltanatty rásimde sóz sóılegen Qazaqstan Respýblıkasy Syrtqy ister mınıstri Ermek Kósherbaev Kıprdiń Qazaqstannyń Eýropalyq odaqtaǵy mańyzdy seriktesteriniń biri ekenin atap ótip, elshiliktiń ashylýy Ortalyq Azııa men Jerorta teńizi óńiri arasyndaǵy ózara is-qımyldy damytýǵa yqpal etetinin aıtty.
Óz kezeginde Kıpr Respýblıkasynyń Syrtqy ister mınıstri Konstantınos Kombos Kıprdiń óńirdegi alǵashqy dıplomatııalyq ókildiginiń ashylýynyń mańyzdylyǵyn atap ótip, Qazaqstanmen ekijaqty yntymaqtastyqtyń odan ári dáıekti túrde damıtynyna senim bildirdi.
Aıta ketelik Kıpr Prezıdenti Nıkos Hrıstodýlıdıstiń Qazaqstanǵa resmı sapary aıasynda eki eldiń bilim, ǵylym, tsıfrlandyrý, mádenıet, sport jáne ınvestıtsııa salalaryndaǵy yntymaqtastyqty damytýǵa baǵyttalǵan memorandýmdar men kelisimderge qol qoıyldy.
