Astanada «KIOSH-2015» halyqaralyq konferentsııasy men kórmesi ótedi

ASTANA. QazAqparat - 28-29 sáýirde Astanadaǵy «Kórme» kórme ortalyǵynda Búkilálemdik eńbekti qorǵaý kúnine oraı V qazaqstandyq halyqaralyq konferentsııasy jáne eńbekti qorǵaý jáne óndiris qaýipsizdigi jónindegi «KIOSH-2015» kórmesi ótedi, dep habarlaıdy QR Densaýlyq saqtaý jáne áleýmettik damý mınıstrliginiń baspasóz qyzmetinen.

«KIOSH-2015» konferentsııasy óndiristik jaraqat pen kásibı aýrýlardyń aldyn alý jáne profılaktıkasy, sonymen qatar tıimdi sheshimder qabyldaý boıynsha mańyzdy máseleler talqylanatyn iri pikirtalas alańy bolyp tabylady. Konferentsııa maqsaty - kásiporyndarda jaraqattanýshylyqty, óndiristik apattarda táýekeldi tómendetý, qoǵamǵa jáne qorshaǵan ortaǵa tıgizetin qaýipti azaıtý, eńbek ónimdiligin arttyrý baǵytynda memlekettik organdar, bıznes jáne qoǵamdyq uıymdardyń kúsh-jigerin biriktirý. Іs-sharaǵa QR Premer-Mınıstriniń orynbasary Berdibek Saparbaev, QR Densaýlyq saqtaý jáne áleýmettik damý mınıstri Tamara Dúısenova, QR Kásipodaqtar federatsııasynyń tóraǵasy Ábilǵazy Qusaıynov, «Atamen» Ulttyq kásipkerler palatasynyń tóraǵasy Abylaı Myrzahmetov, Qazaqstandaǵy Búkilálemdik densaýlyq saqtaý uıymdarynyń ókili Melıta Výınovıch, Halyqaralyq eńbek uıymynyń ulttyq úılestirýshisi Talǵat Ómirjanov jáne taǵy basqalary qatysady. Al KIOSH kórmesinde qurylysta, energetıkada, hımııalyq óndiris salalarynda, taý-metallýrgııalyq, munaı-gaz salalarynda qaýipsizdikti qamtamasyz etýge arnalǵan keshendi ónimder men qyzmetter usynylady. Eske sala keteıik, eńbekkerlerdiń quqyqtaryn qorǵaý, eńbek qaýipsizdigin jáne jumyskerlerdi áleýmettik qorǵaýdy arttyrý maqsatynda Halyqaralyq eńbek uıymynyń sheshimimen 28 sáýir Búkilálemdik eńbekti qorǵaý kúni bolyp bekitilgen.