Astanada kıokýshınkaı-kan karateden VII halyqaralyq týrnır ótedi
ASTANA. QazAqparat - Elordada 22 aqpan kúni saǵat 13.00-de «Alaý» muz saraıynda balalar, jastar, erler men áıelder arasynda kıokýshınkaı-kan karateden jyl saıynǵy «TMD kýbogy» VII halyqaralyq týrnıri óz týyn kóteredi, dep habarlanǵan elorda ákimdiginiń resmı saıtynda.
Týrnır Keńes áskerleriniń Aýǵanstannan shyǵarylýynyń 25 jyldyǵyna oraılastyrylǵan deıdi QR kıokýshınkaı-kan karate ulttyq federatsııasynyń baspasóz qyzmetinen.
Saıysta TMD memleketterinen kelgen 400-ge jýyq sportshy boz kilemde baq synasady. Jeńimpazdar medaldar men kýboktardy ıelenip, maqtaý qaǵazdary men baǵaly jáne aqshalaı syılyqtarǵa ıe bolady.
Kıokýshınkaı-kan - karateniń aıla-tásilderiniń qarapaıymdylyǵymen jáne tıimdiligimen erekshelenetin túri. Atalǵan sport túri adamnyń basty alǵyrlyq qasıetterin damytady.
Aıta keteıik, Qazaqstanda 5000-nan astam adam osy sport túrimen shuǵyldanady, bul kórsetkish jyldan-jylǵa artyp keledi.
