Astanada qylmys deńgeıi 9 paıyzǵa tómendedi

ASTANA.KAZINFORM – Elorda turǵyndary men qonaqtarynyń qaýipsizdigin qamtamasyz etý maqsatynda tıisti sharalar qabyldanyp jatyr. Bul týraly Astana qalasy polıtsııa departamentiniń bastyǵy Marat Tólebaev qala ákimdiginde ótken jıynda habarlady.

- Qabyldanǵan sharalardyń nátıjesinde elordada tirkelgen qylmystar sany 9 paıyzǵa azaıdy. Atap aıtqanda asa aýyr qylmystar; adam óltirý, zorlaý, qaraqshylyq, buzaqylyq faktilerin ashý kórsetkishi artty, – dedi departament basshysy.

Onyń aıtýynsha, esirtki qylmystary men kólik urlyǵy syndy aýyr sanattaǵy quqyq buzýshylyqtardy ashý kórsetkishi de jaqsarǵan.

– Internet alaıaqtyǵyna qarsy is-qımyl sharalarynyń arqasynda onlaın qylmystar sany qysqaryp, olardy áshkereleý deńgeıi artty. Bul baǵytta 77 adam men 3 qylmystyq top ustaldy. Sondaı-aq, 450 jalǵan habarlandyrý men quqyqqa qarsy ınternet-resýrstar buǵattaýǵa joldandy. Prokýratýra «Qazaqtelekommen» birlesip, eki koll-ortalyqtyń jumysyn toqtty, – dedi Marat Tólebaev.

Spıkerdiń aıtýynsha, nashaqorlyqqa qarsy kúres sheńberinde «Astana – esirtkisiz qala» baǵdarlamasy iske asyrylyp jatyr.

– Esirtkimen kúres tásilderi jańartylyp, onlaın ortada taralatyn esirtki arnalaryna tosqaýyl qoıý jumysy kúsheıtildi. Atalǵan baǵytta 488 ınternet-resýrs buǵattaýǵa jiberilip, 48,5 mln teńge kólemindegi qarajat pen 1792 bank kartasy tárkilendi. Zańsyz esirtki jarnamasyna baılanysty 8 qylmystyq is qozǵaldy, – dedi departament basshysy.

Jalpy, jyl basynan beri esirtkige qatysty 528 quqyq buzýshylyq faktisi tirkelip, onyń ishinde 131 is – satý deregi retinde tanylǵan. Tárkilengen esirtkiniń jalpy salmaǵy artqan. Sonymen qatar, esirtki bıznesimen aınalysqan úsh qylmystyq toptyń qyzmetine tosqaýyl qoıylǵan.

Buǵan deıin, Jasandy ıntellekt «Sotqa deıingi tergep-tekserýdiń biryńǵaı tizilimi» aqparattyq júıesine biriktirilgen jáne tergeýshiniń kúndelikti jumysyn avtomattandyrýǵa kómektesetinin jazǵanbyz.