Astanada kıiz ónimderiniń «Ǵasyrlar órnegi» atty kórmesi ashyldy
ASTANA. 3 shilde. QazAqparat - Astanada QR Tuńǵysh Prezıdentiniń murajaıynda sýretshi Zámzegúl Oralbaeva men modeler Ásel Haırollanyń «Ǵasyrlar órnegi» atty birlesken kórmesi ashyldy.
Atalǵan kórme murajaıdyń «Úkili úmit» atty jastardy qoldaý arnaıy jobasynyń aıasynda uıymdastyryldy.
«Búgin bizdiń murajaıda eki avtordyń jumystary usynylyp otyr. Biraq olar bir tabıǵı ónimmen - kıizben jumys jasaıdy», - deıdi QR Tuńǵysh Prezıdentiniń murajaıy dırektorynyń orynbasary Kúláısha Aqtaeva.
Onyń aıtýynsha, búginde ulttyq naqyshtaǵy tabıǵı ónimnen jasalatyn buıymdar halyqaralyq arenada jáne saýda alańdarynda úlken suranysqa ıe.
«Bul eki avtor qazaqstandyq brendti, ulttyq mádenıetimizdiń birtýmalyǵyn álemdik deńgeıde tanytyp júr. Olardyń qolynan shyqqan erekshe buıymdar kez kelgen ıntererge kelisip, jarasymdy úılesim tabady. Sondyqtan olardyń eńbekteri úlken suranystan eshqashan qaǵylǵan emes. Kórmege Z. Oralbaevanyń 20 dúnıesi men A. Haırollanyń 18 kóılegi qoıylǵan», - dep atap ótti K. Aqtaeva.
Zámzegúl Oralbaeva 1975 jyly Aqmola oblysynda Orazaq aýylynda týǵan. 2001 jyly QR Sýretshiler odaǵynyń múshesi atandy, «Shabyt» halyqaralyq festıvaliniń laýreaty.
Ásel Haırolla 1988 jyly Aqtóbe oblysy Qandyaǵash qalasynda týǵan. Modeler arasynda ótken túrli halyqaralyq baıqaýlardyń dıplomanty.
«Ǵasyrlar órnegi» kórmesi bir aıǵa sozylyp, 3 tamyz kúni aıaqtalady.
