Astanada kıiz basý óneriniń dástúrli ádisterin usynatyn kórme ashyldy
ASTANA. 16 qańtar. QazAqparat - Búgin Astanada Ramada Plaza qonaq úıinde «Qorǵan múıiz» atty kıizden jasalǵan óner týyndylarynyń kórmesi ashyldy.
Kórme avtory - qazaqstandyq sýretshi Zámzágúl Oralbaeva.
«Bul kórme qazaqtardyń ulttyq turmys saltynan shyqqan kóne kıiz basý ónerin dáripteıdi. Bul bizge qanmen, ana sútimen keletin dúnıe, ulttyq jádigerimiz. Sondyqtan halyq úshin kıiz basý óneri - qyzyq taqyryp. Árıne, ol - azaby mol eńbek, materıaldyń ózindik erekshelikteri de bar, alaıda onymen jumys isteý asa qyzyq», - deıdi Z.Oralbaeva «QazAqparat» tilshisine bergen suhbatynda.
Onyń aıtýynsha, kórmede 20 avtorlyq jumys usynylyp otyr. Jalpy kıizden jasalǵan 30-40 dúnıe ózge memleketterde ashylǵan kórmelerde tur.
«Maǵan ustazdyq etken sýretshi Galına Goncharova bolatyn. Ol kisi de buryn ózi aýyldarǵa baryp, bul ónerdiń qyr-syryn zerttegen. Men de aýylda kıiz basýdy úırenip júrdim», - deıdi sýretshi.
Óz eńbekterinde avtor darhan dalanyń, keń saharanyń motıvterin berýge tyrysqan. Jáne ózine jaqyny da sol kórinedi.
«Árıne, mende zamanaýı álemdik taqyryptarǵa jaqyn dúnıeler bar, biraq kóbine-kóp men qazaqtyń ulttyq nyshanyn bildirýge kóp kóńil bólemin», - dep atap ótti ol.
Sonymen qatar sýretshi kórmeniń ataýy nelikten «Qorǵan múıiz» dep qoıylǵandyǵyn aıtyp berdi. Onyń aıtýynsha, qazaqtardyń kıizden jasalǵan kilemderiniń eń kóp taraǵany - baılyqty, gúldenýdi, molshylyqty bildiretin «qoshqar múıiz» oıý-órnegimen kestelengen kilemder. Kórmeni «Qorǵan múıiz» dep ataı otyryp, avtor memleket pen pen qoǵamnyń nazaryn qazirgi qazaq dekoratıvtik-qoldanbaly ónerdiń, onyń ishinde kıiz basý óneriniń ózekti máselelerine aýdarýǵa tyrysqan.
«Qoshqar múıiz - ulttyq órnekterimizdiń ishinde qazaq halqynyń tól nyshany. Syrmaqta da, tekemette de buny bizdiń ájelerimiz qoldanǵan. Sondyqtan «Qutqarýshy múıiz» dep atalýynyń ózi bizdiń ulttyq ónerimizdiń qutqarýshysy dep yrymdap qoıdyq. Mine, sony damytý úshin, qutqarý úshin biz «Dala arýlary» atty qoǵamdyq qor quryp otyrmyz. Osy kórme uıymnyń resmı tanystyrylymyna oraı uıymdastyrylyp otyr. Bizdiń ónerimizdiń adymy qazirgi ýaqytta baıaý. Sony álemdik deńgeıge kótersek, qoǵam bolyp damytsaq, áıelderdi, kelinshekterdi úıretsek nur ústine nur», - dep túıdi sózin Z.Oralbaeva.
