Astanada QHR-diń Qazaqstandaǵy Mádenıet kúnderi ótedi
ASTANA. QazAqparat - QR Prezıdenti N. Nazarbaevtyń 2012 jyly 5-7 maýsymda Qytaı Halyq Respýblıkasyna jasaǵan resmı saparynyń qorytyndysy boıynsha QR Premer-Mınıstriniń tapsyrmasyna sáıkes, 2014 jylǵy 25-28 qyrkúıekte Qytaı Halyq Respýblıkasynyń Qazaqstan Respýblıkasyndaǵy Mádenıet kúnderi ótedi.
Bul týraly »Qazaq áýenderi» AQ-nyń baspasóz hatshysy Ismaıl Ádilet habarlady.
Mádenıet kúnderi aıasynda 25 qyrkúıekte saǵat 16.00-de Ulttyq murajaıda qytaı farfory kórmesi jáne Qytaıdyń ekologııalyq mádenıeti taqyrybyndaǵy fotokórme uıymdastyrylady. Kórmelerde Qytaıdyń eksklıýzıvtik, zamanaýı, qoldan jasalǵan farfor buıymdary, keramıka qolóneri jáne Qytaıdyń ekomádenıeti men ekoaýyldar qurylysynyń tabysyn beıneleıtin fotokartınalar kórsetilmek. Kórmeler 14 qazanǵa deıin jumys isteıdi.
Sondaı-aq 25 qyrkúıekte saǵat 19.00-de «Astana Opera» Memlekettik opera jáne balet teatrynyń sahnasynda, 28 qyrkúıekte saǵat 19.00-de Abaı atyndaǵy Qazaq memlekettik akademııalyq opera jáne balet teatrynda Qytaı Halyq Respýblıkasy óner sheberleriniń kontsertteri ótedi.
Kontsertterde QHR Ortalyq halyqtyq án men bı ansambli, Hýatszın dramalyq bı trýppasy, Taııýan qalasynyń tsırk óneriniń trýppasy, «Vý sefen» orkestri men Qytaıdyń tanymal ártisteri - Vý Na, Dýn Feı, Goý Chanchan, Chen Chen, Mý Mıntszıan, Muralaı Beımurat jáne t.b. óner kórsetedi. Kontserttik baǵdarlamaǵa qytaı halqynyń ánderi men bıi, mýzykasy jáne tsırktik óneri engizilgen.
