Astanada kezekti Ulttyq delfıı oıyndary bastaldy
ASTANA. QazAqparat –13-17 qyrkúıek aralyǵynda elordada «Silkway Creative Games» XIV Ulttyq delfıı oıyndary ótedi. Bul týraly Astana qalasynyń kommýnıkatsııalar qyzmetinde ótken brıfıngide Mádenıet basqarmasy mádenıet jáne ónerdi damytý bóliminiń basshysy Aqerke Jumanbaeva aıtty, dep habarlaıdy QazAqparat tilshisi.
«13-17 qyrkúıekte elordada «Silkway Creative Games» XIV Ulttyq delfıı oıyndary ótedi. 2023 jyldyń 30 sáýiri men 5 qyrkúıegi aralyǵynda Ulttyq Delfıı komıteti óńirlik irikteý týrlaryn ótkizdi. Onyń qorytyndysy boıynsha ár oblystardan úzdikter anyqtalyp, Ulttyq delfıı oıyndaryna qatysý úshin óńirlik quramalar jasaqtaldy. Bıyl ulttyq oıyndar Qazaqstanda 14-shi ret ótkiziledi, al Astana bul aýqymdy mádenı sharany 4-shi ret qabyldaýda. Oıyndar 10-15 jáne 16-25 jas sanatyndaǵy 14 konkýrstyq nomınatsııa boıynsha ótedi. Qatysýshylar fortepıano, skrıpka, akademııalyq án aıtý, halyq aspaptary, halyq áni, halyq bıi, zamanaýı bı, fotografııa, kıim dızaıny, kórkem oqý, teatr óneri, beıneleý óneri, sándik-qoldanbaly óner, ym-ıshara tilinde án aıtý boıynsha baq synaıdy», - dedi Aqerke Jumanbaeva.
Onyń aıtýynsha, Ulttyq delfıı oıyndaryna qatysý úshin elimizdiń 17 oblysynan 500 qatysýshy keledi dep josparlanýda.
«Ulttyq delfıı oıyndarynyń jeńimpazdary bıyl 6-10 qazan kúnderi Qyrǵyz Respýblıkasynyń Bishkek qalasynda ótetin Halyqaralyq delfıı oıyndarynda óner kórsetýge múmkindik alady», - dep túıindedi Aqerke Jumanbaeva.
