Astanada kezekti «AQMOL» saýda dúkeni ashyldy
ASTANA. QazAqparat - Elorda turǵyndary men qonaqtary úshin «AQMOL» dúkender jelisiniń kezekti saýda ortalyǵy ashyldy, dep habarlaıdy QazAqparat tilshisi.
Shaǵyn saýda dúkeninde halyq kóp tutynatyn azyq-túlik túrleriniń baı assortımenti qoıylǵan. Atap aıtqanda, kókónister, et jáne sút ónimderi, nan ónimderi, ósimdik maıy jáne taǵy basqalar.
Dúkenge 118 ártúrli mekemeler taýar jetkizse, onyń 30-y Aqmola oblysynyń taýar óndirýshileri, ıaǵnı saýdaǵa qoıylǵan taýardyń 800 túri osy óńirden tikeleı jetkiziledi.
Uıymdastyrýshylardyń aıtýynsha, dúkenniń ereksheligi joǵary sapaly azyq-túlik pen baǵanyń qoljetimdi bolýy.
Osymen 5-inshi saýda núktesiniń ashylý rásimine Astana qalasynyń ákimi Baqyt Sultanov pen Aqmola oblysynyń ákimi Málik Myrzalın qatysty.
«Dúkenniń basty artyqshylyǵynyń biri - taýar óndirýshiden satyp alýshyǵa tikeleı jetkizilýi. Odan bólek, baǵanyń qoljetimdi bolýy. Atap aıtsaq, ettiń baǵasy Astana naryǵynan 20% arzan, un 45% arzan, sol sekildi basqa taýarlar da osyndaı tómen baǵamen satylady. Bul bir jaǵynan elorda halqyn sapaly ári qoljetimdi azyq- túlikpen qamtamasyz etsek, ekinshi jaǵynan Aqmola oblysy taýar óndirýshileriniń Astana naryǵyna tikeleı shyǵý múmkindigi keńeıýde. Aldaǵy ýaqytta bul jumystar óz jalǵasyn tabady», - dedi elorda ákimi.
Osy rette aqmolalyq taýar óndirýshiler aldaǵy jyly qala boıynsha taǵy 2 saýda núktesiniń ashylatynyn aıtyp ótti.
Aıta ketsek, jańadan ashylǵan «AQMOL» azyq-túlik dúkeni qaladaǵy Syǵanaq kóshesi, 5\4 («Mıson» turǵyn úı kesheni) mekenjaıy boıynsha ashyldy.
