Astanada kezekte turǵysy kelmegen turǵyn máseleni qarýmen sheshýdi jón kórgen
ASTANA. 21 qazan. QazAqparat - Astana jol-patrýldik polıtsııasynyń qyzmetkerleri tehnıkalyq qyzmet kórsetý stansasynyń qyzmetkerlerine oq atqan 23 jastaǵy jergilikti turǵyndy ustady, dep habarlady Astana qalasynyń ІІD baspasóz qyzmetinen.
Kóliginiń dońǵalaqtaryn aýystyrýǵa kelgen jas jigit óz kezegin kútkisi kelmeı, sol úshin stansa jumysshylarymen sózge kelip qalǵan. Janjal kezinde tóbelesqor qyzmetkerlerge travmatıkalyq qarýdan oq atqan.
Atystyń saldarynan, 33 jastaǵy er adam keýde tusynan jaraqat aldy. Ekinshi jumysshynyń jambasy jaralandy. "Jedel járdem" dárigerleriniń kómegimen ekeýi de aýrýhanaǵa jetkizildi.
Atalǵan fakti boıynsha QR QK 257-babynyń 3-tarmaǵy boıynsha qylmystyq is qozǵaldy. Travmatıkalyq tapansha tárkilendi. Jedel tergeý sharalarynyń barysynda kúdiktiniń osyǵan deıin dál osyndaı qylyǵy úshin qylmystyq jaýapkershilikke tartylǵany belgili boldy. Ustalǵan adam Astana qalasynyń ýaqytsha ustaý oqshaýlaǵyshyna qamaldy. Tergeý júrgizilip jatyr.
