Elordada kezekte turǵan 535 azamatqa jaldamaly páterdiń kilti tabystalady
ASTANA. KAZINFORM — Jýyrda elordalyq turǵyn úı kezeginde turǵan azamattar arasynda 535 jaldamaly páter úlestiriledi.
Orken Otbasy Bank turǵyn úımen qamtamasyz etý ortalyǵynyń málimetinshe, bul maqsatqa Esil aýdanyndaǵy Orman Park turǵyn úı kesheninen 362 bir bólmeli jáne 173 eki bólmeli páter daıyndalǵan.
Páterlerdi bólýge áleýmettik osal toptarǵa jatatyn azamattar, memlekettik qyzmetshiler jáne baspanasy apatty dep tanylǵan turǵyndar qatysady.
Ortalyqtyń habarlaýynsha, úmitkerler 1414 nómirinen keletin SMS-habarlamany kútýi qajet. Habarlama alǵannan keıin azamattar bes jumys kúni ishinde usynylǵan baspanaǵa kelisetinin nemese bas tartatynyn sheshýi tıis.
Ol úshin ETsQ arqyly baspana.otbasybank.kz portalynda avtorızatsııadan ótip, jeke kabınettegi «Jaldamaly turǵyn úı» bóliminde óz sheshimin rastaýy qajet.
Qoldanystaǵy tártipke sáıkes, páterlerdiń 70%-y áleýmettik osal toptarǵa beriledi. Olardyń qatarynda ardagerler, I jáne II toptaǵy múgedektigi bar adamdar, múgedektigi bar bala tárbıelep otyrǵan otbasylar, kópbalaly otbasylar, jesirler, sondaı-aq jetim balalar men ata-anasynyń qamqorlyǵynsyz qalǵan balalar bar.
Sonyń ishinde bólinetin turǵyn úıdiń jalpy kóleminiń 20%-y jetim balalarǵa qarastyrylǵan. Al qalǵan 30% páter ózge kezektegiler men memlekettik qyzmetshiler arasynda úlestiriledi.
Eske sala keteıik, Almatyda bir bólmeli páterge 990 adamdy tirkegen turǵyn sottaldy.
