Astanada kezekti bos jumys oryndaryna arnalǵan jármeńke ótti

ASTANA. KAZINFORM — Astanadaǵy «Esil University» oqý ornynyń qabyrǵasynda jastarǵa arnalǵan bos jumys oryndary jármeńkesi ótti. Bul týraly Astana qalasy ákimdiginiń baspasóz qyzmeti habarlady.

Atalǵan ýnıversıtettiń jyl saıyn eki ret ótkizetin is-sharasyn birge uıymdastyrýǵa Astana qalasynyń Jastar saıasaty máseleleri basqarmasy, «Astana jastary» jastar resýrstyq ortalyǵy, qalalyq «Eńbek mobıldiligi ortalyǵy» mekemesi qoldaý bildirdi.

Jármeńkege qaladaǵy 50 jumys berýshi uıym, 800-den astam jumys izdep júrgen azamat, JOO túlekteri jáne elorda jastary qatysty.

Bos jumys oryndary jármeńkesiniń negizgi maqsaty — jumys berýshi men jumys izdeýshi arasyndaǵy tikeleı baılanys arqyly jumyssyz azamattardy, bilim berý uıymdarynyń túlekteri men jastardy jumysqa ornalastyrýǵa járdemdesý.

«Astana jastary» jastar resýrstyq ortalyǵy NEET sanatyndaǵy jastarmen jumys boıynsha bólim basshysy Sultan Ómirǵalıev mundaı is-sharalar ótkizý jastardy qoldaý baǵytyndaǵy memlekettik saıasattyń mańyzdy bir bóligi ekenin atap ótti.

— Memleket basshysy adamı kapıtaldy damytý jáne jastardy qoldaý elimizdiń mańyzdy basym baǵyty ekenin atap aıtady. Bıyl biz osymen úshinshi jármeńkeni ótkizip otyrmyz. Buǵan deıin S. Seıfýllın atyndaǵy Qazaq agrotehnıkalyq zertteý ýnıversıtetinde jáne Barys Arena ǵımaratynda jumyssyzdar úshin iri qalalyq jármeńke uıymdastyrdyq. Al búgin osy oqý ornynda 3-4 kýrs stýdentteri úshin jármeńke ótkizilip jatyr, — deıdi ol.

Jármeńkeniń ashylýyna kelgen Memlekettik qyzmet isteri agenttiginiń Astana qalasy boıynsha departamentiniń Memlekettik qyzmet basqarmasynyń basshysy Nazgúl Ahmetjanovanyń aıtýynsha, búgingi tańda elordada Ortalyq atqarýshy organdardyń aýmaqtyq departamentteri jáne jergilikti atqarýshy organdar boıynsha 300-ge jýyq bos jumys oryndary bar.

— Astanada jergilikti atqarýshy organdarda 70-ten astam bos jumys orny bar, sonyń 50-den kóbi — eń tómengi atqarýshy laýazymdar. Jastardy osy bos jumys oryndaryna ornalastyrýǵa múmkindik bar. Sebebi bul qyzmetterge eshqandaı eńbek ótili talap etilmeıdi. Memlekettik qyzmet — san alýan sala. Sondyqtan kez kelgen mamandyq ıesiniń jumysqa turýǵa múmkindigi zor. Eń bastysy bári zańnamany bilýge arnalǵan test tapsyrýy kerek. 2023 jyldan bastap memlekettik organdarǵa jumysqa turý úshin irikteý satylaryn tsıfrlandyrý maqsatynda, ıaǵnı adamı faktordy azaıtý úshin www.eqyzmet.gov.kz portaly jasaqtaldy, búginde 68 memlekettik organ soǵan engen. Barlyq synaqtar kezeńi osy portal arqyly júzege asyrylady, — deıdi Nazgúl Ahmetjanova.

Jumys berýshiler qatarynda qalalyq mekemeler, «QTJ» UK» AQ, «Qazposhta» sııaqty kompanııalar jáne ekinshi deńgeıli bankter kóp. Jármeńke barysynda jumys berýshiler óz kompanııalaryndaǵy mamandyqtardy tanystyryp, bos jumys oryndaryn usyndy jáne kelgen azamattar arqyly ózderine eń qolaıly úmitkerlerdiń bazasyn qalyptastyrýǵa múmkindik aldy. Jumys izdeýshiler kompanııalardyń HR-menedjerlerimen tikeleı tildesip, suhbattasyp, qyzyqtyrǵan suraqtaryn qoıdy.

Aıta ketelik 189 jumysqa alý tártibin buzý faktisi anyqtalǵany týraly jazǵan edik.