Astanada kezeksiz emhanalar paıda boldy
Astanadaǵy alǵashqy medıtsınalyq uıymdardyń birinde kezekti elektrondy basqarý júıesi engizildi. Bul dárigerler kabınetindegi kezekti azaıtýǵa múmkindik berdi. Atalǵan emhana qaladaǵy 74 myńnan astam adamǵa qyzmet kórsetetin (kúnine 500-den astam qabyldaý júzege asyrylady) iri emhanalardyń biri bolyp tabylady.
Emhanada patsıentterdiń medıtsınalyq qyzmetkerlermen belsendi túrde aralasýy úshin zal uıymdastyryldy. Munda patsentterge árkez kómekke kelýge daıyn turatyn medıtsınalyq qyzmetkerler arasynan taǵaıyndalǵan birneshe admınıstratorlar qyzmet kórsetedi.
Medıtsınalyq uıymda tirkeý protsedýralary ózgertildi - HQKO sııaqty «kedergisiz» úlgide jasaldy. Munda patsıentter elektrondyq júıe arqyly dárigerge jazylyp, emhanaǵa tirkelip, qajetti konsýltatsııa ala alady. Sonymen qatar, dárigerlik qabyldaýǵa telefon jáne ınternet arqyly (egov elektrondyq úkimet portaly) jazylý múmkindigi týyndady.
Shuǵyl jaǵdaıdaǵy patsıentter úshin dárigerlerdiń arnaıy qabyldaýy men kirý esigi uıymdastyryldy. Balalar, júkti áıelder men eresekter úshin jeke-jeke tirkeý oryndary bar. Patsıentter aǵymy 3 baǵyt boıynsha (shuǵyl, josparly, halyqtyń áleýmettik turǵydan osal toby) bólindi. Patsıentterdiń dárigerlerge aldyn ala jazylýyn engizý patsıenttiń jeke ýaqytyn josparlaýǵa, olardyń medıtsınalyq uıymdarda ótkizetin ýaqytyn 1 saǵattan 15 mınýtqa deıin qysqartýǵa múmkindik berdi.
Sonymen qatar, analızderdi tapsyrý kabınetterindegi kezekti azaıtý boıynsha jumys retteldi, ol úshin júkti áıelder men balalardyń analızderin aýrýlardyń negizgi aǵymynan bólek qabyldaý oryndary jasaldy.
Sonymen birge, tegin dári-dármek retseptin alý júıesi ózgertildi. Sozylmaly aýrýlary bar dıspanserlik patsıentter úshin 3 aılyq merzimge arnalǵan retseptiler bir merzimde beriletin boldy, budan buryn olar dárigerge aı saıyn qaralýy tıis bolatyn.
Esterińizge sala keteıik, QR densaýlyq saqtaý salasyn damytýdyń 2016-2019 jyldarǵa arnalǵan memlekettik baǵdarlamasynyń aıasynda QR Densaýlyq saqtaý jáne áleýmettik damý mınıstrligi elimizdiń barlyq emhanalarynda aǵymdaǵy jyldyń basynan bastap «Kezeksiz emhana» ımıdjdik jobasyn júzege asyryp keledi. Atalǵan joba aıasynda emhanalardaǵy kezekti azaıtý maqsatynda eresek azamattardy profılaktıkalyq tekserýden ótkizý protsedýralaryn jeńildetý qarastyrylǵan. Sonymen qatar, dıspanserlik aýrýlarǵa jeńildetilgen dári-dármek berý protsedýralaryn ońtaılandyrý qarastyrylǵan.