Astanada keıingi jyldary týrızm salasy qarqyndy damýda
ASTANA. 13 shilde. QazAqparat - Elordanyń ekonomıkalyq damýynyń basym baǵyttarynyń biri - týrızm bolyp tabylady.
Býrabaı, Zerendi, Qorǵaljyn sııaqty tabıǵı ásem aımaqtar men elordanyń áleýmettik-ekonomıkalyq ómirindegi aıtarlyqtaı oń ózgerister týrıstik qyzmettiń keńinen etek alýyna zor múmkindikter týǵyzyp otyr. Ózindik sáýlet ereksheligi men sulýlyǵy, ınfraqurylymdyq ásem kelbeti bar memleketimizdiń jas astanasyna degen úlken qyzyǵýshylyq pen taǵy basqa da jaǵymdy kórsetkishter týrızm salasyn órkendetýdiń basty kepildikteri ekeni belgili.
Elordanyń remı saıtynyń jazýynsha, 2000 jyly qalada jeke kásipkerlikti qosqanda tek 48 týrıstik fırma men 18 qonaq úı tirkelgen.
Al 2013 jyldyń 1 qańtaryndaǵy málimet boıynsha, Astana qalasynda jeke kásipkerlik qyzmetin qosa eseptegende 270 týrıstik fırma men 135 qonaq úı bar ekeni belgili bolyp otyr. Mundaı ósim elordaǵa, bizdiń memleketimizge degen qyzyǵýshylyqtyń órkendeı túsken mańyzyn kórsetedi.
Qazaqstanǵa, onyń ishinde Astanaǵa kelip jatqan týrıster sany jyl sanap eseleı artýda. Statıstıka departamentiniń habarlaýynsha, qalada 2012 jyly týrıstik fırmalar men qonaq úıler 637,4 myń týrıstke qyzmet kórsetken.
