KESHYOU-diń 20 jyldyǵy: Astanadaǵy ótetin kontsert baǵdarlamasy 40 paıyz jańartyldy
ASTANA. KAZINFORM – KESHYOU tobynyń 20 jyldyǵyna arnalǵan Astanadaǵy kontsertke barlyq bılet nebári eki-aq kún ishinde satylyp ketti.
Kontsert 19 qyrkúıek kúni saǵat 19:00-de «Barys Arenada» ótedi.
Uıymdastyrýshylardyń aıtýynsha, Astanadaǵy baǵdarlama Almatydaǵy kontsertten ózgeshe bolmaq. Onyń shamamen 40 paıyzy jańartylyp, jańa nómirler qosylatyn bolady.
Buǵan deıin KESHYOU toby 20 jyldyǵyna arnalǵan úlken kontsertin 29 mamyrda Almatydaǵy Ortalyq stadıonda ótkizdi. Ony 25 myńnan astam adam tamashalady. Sol kúni sahnaǵa toptyń ár jyldardaǵy quramynda án aıtqan ánshiler jınalyp, kópshilikke jaqsy tanys ánder jańa nusqada oryndaldy.
Astanadaǵy kontsertke de KESHYOU-dyń ár jyldardaǵy quramynda bolǵan ánshiler qatysady. Baǵdarlamaǵa toptyń 20 jyl ishinde jaryq kórgen tanymal ánderi engen.
Uıymdastyrýshylardyń sózinshe, kontsertke daıyndyq birneshe aıǵa sozylǵan. Shoý úshin 450-den astam sahnalyq kostıým tigilip, dekoratsııalar men rekvızıtter ázirlengen. LED-ekrandarǵa arnalǵan beıneler daıyndalyp, ár nómirge jeke bı qoıylǵan.
Bıshiler men áýe akrobattary arnaıy kastıng arqyly iriktelgen. Sondaı-aq «Barys Arena» sekildi úlken sahnaǵa laıyqtalǵan bı qoıylymdary daıyndalǵan.
Kontserttiń resmı bılet operatory – Freedom Afısha (ex-Ticketon). Bıletter túgel satylyp ketkennen keıin uıymdastyrýshylar olardy áleýmettik jelilerden jáne basqa da beıresmı arnalardan satyp almaýǵa keńes berdi. Óıtkeni mundaı bıletterdiń jaramdy ekenine kepildik joq.
Al kontsertke bara almaıtyndar bıletin Freedom Fan2Fan resmı qaıta satý servısi arqyly sata alady.
Aıta keteııik, osyǵan deıin Kane kontserti Almatyǵa 5 mlrd teńge paıda ákelgen bolatyn.
