Qyzylordadaǵy «Kókaral» bógetiniń jumysy qashan qalpyna keltiriledi

ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov pen oblys ákiminiń orynbasary Bahyt Jahanov Aral aýdanyndaǵy «Kókaral» bógetin qalpyna keltirý jumystarynyń barysymen tanysty.

Mınıstrlik málimetinshe, Memleket basshysynyń 2019 jylǵy 14 mamyrdaǵy aımaqqa jumys saparynda Úkimet pen oblys ákimdigine «Kókaral» bógetin qalpyna keltirýde shuǵyl sharalar qabyldaý tapsyrylǵan bolatyn.

— Osy tapsyrma boıynsha «Kókaral bógetin saqtap qalý jáne Syrdarııa ózeniniń atyraýyn qalpyna keltirý» jobasynyń joba-smetalyq qujattamasy ázirlenip, memlekettik saraptamadan oń qorytyndy alyndy. Jobanyń jalpy quny — 4,5 mlrd teńge. Tapsyrys berýshi — QR Sý resýrstary jáne ırrıgatsııa mınıstrligi. Jobanyń merdigeri — «Qazsýshar» RMK Qyzylorda fılıaly. Jobany iske asyrý merzimi 2022-2026 jyldar aralyǵyn qamtıdy. Osy kezeńde jumys kezeń-kezeńimen qarjylandyrylyp keledi, — delingen habarlamada.

Joba sheńberinde zaqymdalǵan bóget qalpyna keltirilip, «Qarashalań» kóli arqyly teńizge eki arna jáne «Tuşy» kóli arqyly bir arna qazý josparlanǵan. Bul Kishi Aral teńiziniń ońtústik bóliginde turaqty sý aınalymyn qalyptastyrýǵa múmkindik beredi.

Atalǵan iri ekologııalyq joba Aral óńiriniń tabıǵı tepe-teńdigin qalpyna keltirýge, sý resýrstaryn tıimdi paıdalanýǵa jáne jergilikti halyqtyń turmys sapasyn jaqsartýǵa baǵyttalǵan.

Buǵan deıin habarlanǵandaı, Sý resýrstary mınıstrligi sýdyń «kóleńkeli naryǵymen» qalaı kúresip jatqany belgili boldy.