Astanada Kereı men Jánibek handardan bastap, táýelsizdikke deıingi iri oqıǵalar sýrettelgen ádebı-sazdy kesh ótedi

ASTANA. QazAqparat - Astana qalasy Tilderdi damytý basqarmasynyń uıymdastyrýymen 4 jeltoqsan kúni Astana ulttyq sýret galereıasynda Qazaqstan Respýblıkasynyń Táýelsizdik kúnine arnalǵan «Azattyqtyń ardaǵy» atty ádebı-sazdy kesh ótedi, dep habarlady atalǵan basqarmanyń baspasóz qyzmetinen.

Sharanyń basty maqsaty - táýelsizdik qundylyqtaryn ulyqtaý, óskeleń urpaqty otansúıgishtikke, eljandylyqqa baýlý, memlekettik tildiń qoldanys aıasyn keńeıtý jáne til mártebesin kóterý, mereıin arttyrý.

Ádebı-sazdy keshte Kereı men Jánibek handar tusyndaǵy qazaq memleketiniń qurylǵan ýaqytynan bastap, táýelsizdik alǵan kúnge deıingi qazaq halqynyń basynan keshken iri oqıǵalary, Abaıdyń ulaǵatty sózderi oqylyp, Alash qaıratkerleri týraly kórinister qoıylady. Ony Q.Qýanyshbaev atyndaǵy memlekettik akademııalyq qazaq mýzykalyq darama teatry ártisteri sahnalaıdy. «Atalǵan sharaǵa Qazaqstan Respýblıkasy Parlamenti Májilisiniń jáne qalalyq máslıhat depýtattary, jergilikti memlekettik organ basshylary, zııaly qaýym ókilderi, til janashyrlary men qala turǵyndary shaqyrylyp otyr», delingen habarlamada.