Astanada Kereı men Áz-Jánibek handarǵa jáne Abaıǵa eskertkishter ornatylady
ASTANA. Qańtardyń 13-i. QazAqparat /Gúlmıra Álıakparova/ - Astanada Kereı men Jánibek handarǵa eskertkish aqyry ornatylatyn boldy.
Bas qalamyzdyń ajary sondaı-aq, aqyn Abaı Qunanbaıulyna arnap turǵyzylatyn eskertkishpen de nurlana túspek, dep habarlaıdy QazAqparat.
Búgin «Astana bas joba» memlekettik qazynalyq kásipornynda ótken jyldyń jeltoqsany men 2010 jylǵy qańtardyń 8-i aralyǵynda ótkizilgen Kereı men Jánibek handaryna jáne aqyn Abaı Qunanbaıulyna arnalǵan eskertkishter jobalarynyń eń úzdik eskızdik-ıdeıalaryna jarııalanǵan respýblıkalyq baıqaýdyń nátıjeleri shyǵaryldy.
Astana qalasynyń ákimi Imanǵalı Tasmaǵambetov tóraǵalyq etken qazylar alqasynyń quramyna elordanyń bas dızaıneri men bas sáýletshisi, sýretshiler, músinshiler men jazýshylar kirdi.
Baıqaýǵa barlyǵy 30 joba usynyldy. Onyń 20-sy - A.Qunanbaıulyna, qalǵan 10-y - Kereı men Jánibek handaryna arnaldy.
Uzaq talqydan keıin, qazylar alqasynyń sheshimimen, uly Abaıǵa arnalǵan eskertkish boıynsha birinshi oryndy - almatylyq Bolat Dosjanov, handardyń eskertkishi boıynsha - astanalyq Rınat Ábenov jeńip aldy. Jeńimpazdarǵa júldeli orynmen birge, 1 mıllıon teńge kóleminde syıaqy berildi.
Eskertkishterdiń jobalary aldaǵy jarty jyl boıy antropologtar men etnologtardyń jiti taldaýyna túsetin bolady. Mádenıet jáne aqparat mınıstrligi sońǵy úlgini bekitkennen keıin, qazaq ádebıetin álemge áıgilegen oıshyl, aqyn A.Qunanbaıulynyń eskertkishi Beıbitshilik jáne Abaı kósheleriniń qıylysynda, ıaǵnı Týrızm jáne sport mınıstrliginiń aldynda boı kóteretin bolady. Al Kereı men Áz-Jánibektiń kompozııalyq músinin halyq «Han Shatyr» keshenine qarama-qarsy ornalasqan «Ǵashyqtar» saıabaǵynan tamashalaı alady.
Elordanyń bas sáýletshisi Sársembek Júnisovtyń atap kórsetkenindeı, qoladan quıylatyn eskertkishterge tapsyrys qazaqstandyq zaýyttarǵa beriletin bolady.
Ǵalym, jazýshy Qoıshyǵara Salǵaraulynyń aıtýynsha, handarǵa qatysty jobalarda tańdaý - Ózbek ulysy tarqaǵannan keıingi kezeńde, erdiń ústinde otyrǵan Kereı hannyń Týdy tigý kerek jerin qolmen nusqap turǵan, al Jánibektiń sol Týdy jerge ornatyp turǵan kompozıtsııasyna berilgen. Q.Salǵarauly, avtor sol kezdegi qazaq batyrlarynyń rýhyn barynsha jetkizýge tyrysqandyǵyn aıtady.
Al Abaıdyń alysqa qarap turǵan músininen bilimmen rýhtanǵan tereń oı ústindegi aqynnyń salmaqty kelbetin kórýge bolady.
