Astanada keptelisti azaıtý úshin kólik qozǵalysy avtomattandyrylady
ASTANA. KAZINFORM – Elorda ákimdigi Jol qozǵalysyn basqarýdyń avtomattandyrylǵan júıelerin engizý jáne paıdalaný qaǵıdalaryn bekitti.
Jol júrisin basqarýdyń avtomattandyrylǵan júıesin engizý maqsaty - Astana qalasynyń turǵyndary úshin kóliktik qoljetimdilikti qamtamasyz etý, onyń ishinde kóshe-jol jelisiniń ótkizý qabilettiligin joǵarylatý, apattylyqty azaıtý, qoǵamdyq kóliktiń jumys isteý tıimdiligin arttyrý.
Jol júrisin basqarýdyń avtomattandyrylǵan júıesiniń mindetteri mynadaı:
- kólik júıesiniń paıdalaný tıimdiligin arttyrý;
- kólik aǵyndarynyń ótkizý qabilettiligin ulǵaıtý;
- kóliktiń ár túrlerin paıdalanýmen baılanysty joldaǵy kidiristerdi azaıtý;
- joldaǵy yńǵaılyq pen jaılylyqty arttyrý;
- qoǵamdyq kóliktiń kóliktik qoljetimdiligin ulǵaıtý;
- joldyń josparlanǵan ýchaskesin ótý ýaqytynyń senimdiligi;
- jol júrisi ýchaskeleriniń jalpy jáne jeke qaýipsizdigi;
- jol júrisiniń qaýipsizdigin qamtamasyz etý;
- jol júrisi qatysýshylarynyń qaýipsizdigin ulǵaıtý;
- jol-kólik oqıǵalarynyń sanyn qysqartý;
Avtomattandyrylǵan júıelerdi engizý, paıdalaný jáne basqarý jumystaryn basqarýshy kompanııa júzege asyrady. Júıeni ázirlep, engizý týraly sheshim qabyldanǵanǵa deıin basqarýshy kompanııa elordadaǵy kólik jaǵdaıyna keshendi taldaý júrgizýi tıis.
Atap aıtqanda, kóshe-jol jelisiniń qazirgi jaǵdaıy, ony damytý jáne qaıta qurý josparlary, kólik qozǵalysynyń qarqyndylyǵy men jyldamdyǵy zertteledi. Sonymen qatar jolaýshylar aǵyny, jol qozǵalysy qıyndaıtyn ýchaskeler men jol-kólik oqıǵalary jıi bolatyn oryndar týraly statıstıka eskeriledi.
Zertteý barysynda tańǵy jáne keshki ýaqyttaǵy, sondaı-aq maýsymdyq kezeńderdegi kólik júktemesi de taldanady. Kóshe-jol jelisiniń jekelegen ýchaskeleriniń ótkizý qabiletine suranys pen kólik aǵyndarynyń qozǵalysy boıynsha derekter jınalady.
Budan bólek, ıntellektýaldy kólik júıesin engizý josparlanǵan aýmaqtyń topologııalyq kartasy ázirlenip, kólik quraldarynyń túrleri boıynsha qozǵalys qarqyndylyǵy men jyldamdyǵy saralanady.
Jańa avtomattandyrylǵan júıe arqyly kólik qozǵalysyn uıymdastyrý kezinde jol qaýipsizdigi, kólik aǵynynyń tıimdiligi jáne qoǵamdyq kóliktiń qozǵalysy boıynsha kórsetkishter eskeriledi.
Buǵan deıin elorda ákimdigi eki deńgeıli jolaıryq salý jobasyna qatysty túsinik berdi.
