Astanada kepildik merzimi ótken úıler boıynsha shaǵymdar kóbeıdi
ASTANA. KAZINFORM – Elordada kóppáterli turǵyn úılerdiń turǵyndary kepildik merzimi aıaqtalǵannan keıin de ǵımarattardyń tehnıkalyq jaǵdaıyna qatysty jaýapkershilikti qurylys kompanııalaryna júkteýge tyrysyp jatyr.
Bul týraly qala máslıhatynyń turaqty komıssııasynyń otyrysynda Astana qalasynyń Memlekettik sáýlet-qurylys baqylaý basqarmasynyń basshysy Ǵanı Tájıev málimdedi.
– Kepildik merzimi keminde eki jyl ótkennen keıin turǵyn úılerdiń tehnıkalyq jaǵdaıy men paıdalanýǵa baılanysty máseleler basqarma quzyretine kirmeıdi. Azamattyq kodekstiń 189-babyna sáıkes, eger zańnamada kózdelmese, menshik ıesi óz múlkin kútip-ustaý jónindegi barlyq shyǵyndy ózi kóterýge mindetti. Sondaı-aq «Turǵyn úı qatynastary týraly» zańnyń 32-babynda páter jáne turǵyn emes úı-jaılardyń ıeleri ortaq múlikti kútip-ustaýǵa jáne onyń qaýipsiz paıdalanylýyn qamtamasyz etýge, sonyń ishinde kepildik merzimi aıaqtalǵan soń aǵymdaǵy jáne kúrdeli jóndeýdi uıymdastyrýǵa mindetti ekeni kórsetilgen, – dedi basqarma bastyǵy.
Onyń aıtýynsha, Memlekettik sáýlet-qurylys baqylaý basqarmasyna kelip túsip jatqan ótinishterdi taldaý nátıjesi turǵyndardyń ortaq múlikti kútip-ustaý jónindegi óz mindetterin oryndaýdan jaltaryp, jaýapkershilikti qurylys kompanııalaryna júkteýge tyrysatynyn kórsetip otyr.
– Keı jaǵdaılarda turǵyndar áleýmettik jeliler men blogerler arqyly qoǵamdyq qysym kórsetý tásilin qoldanyp jatyr. Bul óz kezeginde áleýmettik shıelenis týǵyzyp, baqylaýshy jáne qadaǵalaýshy organdardyń qyzmetine qatysty teris qoǵamdyq pikir qalyptastyrady, – dedi ol.
Basqarma basshysynyń dereginshe, bıyl 1 shildedegi jaǵdaı boıynsha Astanada 3 364 kóppáterli turǵyn úı kesheni tirkelgen. Atalǵan basqarmaǵa kún saıyn qurylys sapasyna jáne turǵyn úı keshenderiniń jaı-kúıine qatysty 150-den astam ótinish túsedi. Byltyr kepildik merzimi aıaqtalǵan turǵyn úıler boıynsha jeke jáne zańdy tulǵalardan 7 500-den astam ótinish qabyldanǵan.
Ǵanı Tájıev máslıhat depýtattaryna turǵyn úı jáne turǵyn ınspektsııasy basqarmasyna kondomınıým nysandarynyń ıeleri men MIB tóraǵalary arasynda túsindirý jumystaryn júrgizýdi, sondaı-aq turǵyn úı qory obektilerin paıdalaný men kútip-ustaý talaptarynyń saqtalýyn tekserý sharalaryn uıymdastyrýdy usyndy.
Buǵan deıin Qazaqstanda qurylysy problemaǵa aınalǵan neshe turǵyn úı kesheni bar ekenin jazǵanbyz.