Astanada Kenen Ázirbaevtyń 125 jyldyǵyna arnalǵan saltanatty kesh ótti

«Kenen  Ázirbaev sal-serilerdiń sońǵy tuıaǵy bolǵan,     Birjan  sal men  Aqan  seri sııaqty  qazaqtyń  uly   aqyndarynyń   úzdik  dástúrin    jalǵastyrýshy  aqyn, kompozıtor  edi.   Qazaqstan   tarıhynda tuńǵysh ret    aqyn týyndylarynyń,  ańyzdary men dastandar jınaǵynyń    tórt tomy  jaryq kóredi.  Bul   búkil qazaq  halqy úshin  úlken  mereke», -  dep  atap kórsetti  Mádenıet  jáne aqparat  mınıstri Muhtar Qul-Muhammed óz sózinde.   

Keshte kórermenderge aqıyq aqyn týraly syr shertetin beınekórinis kórsetilip, dáıekti fotoderekter usynyldy.   Sondaı-aq,    jınalǵan qaýym  aqynnyń  «Boztorǵaı» ániniń    jazbasyn tyńdap,  «Týǵan  jer»  ániniń beınejazbasyn tamashalady.

Sharaǵa kompozıtordyń sońynan ergen urpaǵy -   tórt balasy men   nemereleri  qatysty. Kontserttik baǵdarlamada   Bekbolat Tileýhan,  Ramazan  Stamǵazıev,  Altynbek Qorazbaev  syndy        oryndaýshylar   Kenenniń  ánderin oryndady.

Kenen Ázirbaev - san ónerdi jarastyryp teń ustaǵan uly ónerpaz: jyraý, aqyn, jyrshy, kúıshi, ánshi, sazger, shejireshi ári el murasyn saqtaýshy úlken qaıratker. Búgingi kúni Kenen Ázirbaevtyń ánderin barlyq qazaq ánshileri shyrqap keledi.

Tarıhı oqıǵalarǵa Kenen sergek aralasyp, óziniń azamattyq pozıtsııasyn boıyndaǵy býyrqanǵan daryny arqyly aıǵaqtap otyrdy. Bul rette, Kenenniń ánshi, aqyn, jyraý, kúıshi retindegi alýan arnaly shyǵarmalaryn ózi ómir súrgen zamanynyń jandy shejiresi deýge bolady. Ol eki júzdeı lırıkalyq, dıdaktıkalyq arnaýlar men tolǵaýlardyń avtory. Kenen án men jyrdyń kenishi atanǵan Jetisýdyń ǵana emes, ısi qazaqtyń ánshilik-kúıshilik, aqyndyq-jyrshylyq, sal-serilik dástúrin tereń ıgergen óner tarlany. Kenenniń daryn tegeýrini qazaqtyń án ónerin áýendik ıntonatsııalyq jaǵynan baıytyp, ánniń túr-tulǵasyn jańa bıikterge kóterip, taqyryp aıasyna tarıhı-áleýmettik tyń mazmun darytyp, sony óristerge alyp shyqty.