Astanada keń trotýarlar salynady
ASTANA. QazAqparat - Astana ákimi Áset Isekeshev kvartalishi ótpe joldardyń sanyn kóbeıtip, trotýarlardy keńeıtý qajet dep esepteıdi, dep habarlaıdy «QazAqparat» HAA tilshisi.
«Búgin qalany aralap, júzege asyrylyp jatqan birqatar jobany tekserdim.
«Qulager» turǵyn úı kesheniniń 2 jáne 4-shi úıleri mańyndaǵy jolǵa deıingi alań tolyǵymen asfalttalyp, avtoturaqqa aınalady. Aýlaǵa shlagbaým ornatyp, kólikterdi kirgizýge tyıym salý úshin páter ıeleriniń kooperatıvi arqyly turǵyndarmen kelissózder júrgizýdemiz. Aýlalarǵa balalarǵa arnalǵan oıyn jáne sporttyq alańdar ornatyp, kishigirim saıabaq jasaımyz», - dep jazdy ákim Facebooktegi óziniń paraqshasyna.
«Taǵy bir másele - oram ishindegi ótpe joldar. Bıyl Esil aýdanynda osyndaı 18 jol salamyz. Búgin «Infınıtı» TK úıleri mańyndaǵy jumys barysyn tekserip keldim. Bul jumystar mamyr aıynda aıaqtalyp, barlyq ótpe joldar asfalttalady. Sondaı-aq, Syǵanaq kóshesinen EKSPO-ǵa deıingi Qabanbaı batyr kóshesindegi jaıaý júrginshiler jolynyń qurylysy da - mańyzdy jobalardyń biri. Trotýardyń eni 4,5 metrdi quraıdy, onyń 3 metri - jaıaý júrginshilerge, 1,5 metri velosıpedshilerge arnalǵan», - dedi ákim. 
