Astanada ken ıgerýshilerdiń densaýlyǵyn qorǵaý máseleleri talqylanýda

ASTANA. QazAqparat - Búgin Elordada «Hrızotıl jáne qaýipsizdik» atty halyqaralyq ǵylymı-tájirıbelik konferentsııasy óz jumysyn bastady, dep habarlaıdy QazAqparat tilshisi.

Konferentsııa qatysýshylary - Qazaqstan, Reseı, Belarýs jáne basqa da TMD elderindegi hrızotıl ónerkásibiniń ókilderi jumysshylardyń densaýlyǵyn qorǵaýǵa arnalǵan jańa tásilderdi engizý qajettiligin jáne ekonomıkanyń ken ıgerýshi sektorynyń barlyǵynda, sonyń ishinde hrızotıl ónerkásibinde barynsha tıimdi qaýipsizdik júıelerin qalyptastyrý máselesin ortaǵa salýda.

Konferentsııada ǵalymdar, kásipodaq kóshbasshylary óndiristi uıymdastyrýdyń jańa tásilderi, jańa tehnologııalar men hrızotıl-asbestti qoldanýdy baqylaý qaǵıdalaryn endirý jaıly baıandamalaryn tanystyryp jatyr. Medıtsınalyq sarapshylar hrızotıl ónerkásibinde eńbek etetinderdiń densaýlyǵyn qorǵaýdyń qazirgi jáne keleshektegi ádisteri jaıly áńgimeleýde.

 «Qazirgi tańda Qazaqstannyń hrızotıl-tsement salasy 220 myń tonnadan asa hrıozotıl talshyǵyn, 5 mln. shıfer tabaǵyn jáne 7 700 tonna asbest-tsement qubyryn óndiredi. Jyl saıyn hrızotıl-asbest negizinde (hrızotıl-asbest, shıfer jáne qubyrlar) 20 mlrd. teńgeden asa somaǵa taýarlyq ónim shyǵarylady. Saladaǵy jumysshylardyń eńbegin qorǵaýǵa (sonyń ishinde medıtsınalyq tekserý, arnaýly kıim jáne ony óńdeý, arnaıy sút, jeke qorǵanys zattary, mindetti saqtandyrý jáne t.b.) jyl saıyn 102 mln. teńgeden asa qarjy bólinip otyrady», - dedi QR Investıtsııalar jáne damý mınıstrligi Indýstrıaldy damý jáne ónerkásiptiń qaýipsizdik komıteti Qurylys ındýstrııasy jáne aǵash óńdeý ónerkásibi basqarmasynyń basshysy Asqar Saǵıdanov.

Eki kúnge sozylatyn konferentsııa jumysynyń nátıjesi boıynsha ujymdyq sheshimder daıyndalyp, TMD elderiniń hrızotıl-asbest salasyndaǵy jumysshylarynyń jaǵdaıyn jaqsartýǵa jáne densaýlyǵyn saqtaýǵa, óndiris tıimdiligin kóterýge arnalǵan is-qımyldardy maquldastyrý jóninde ortaq qarar qabyldanady dep kútilýde.