Astanada kemtar balalarǵa arnalǵan baqshaǵa saý balalar qabyldanǵan - prokýratýra
ASTANA. QazAqparat - Elordada deni saý 36 bala arnaıy organdardyń joldamasynyń bolmaǵanyna qaramastan, kózderi nashar kóretin balalar baqshasyna qabyldanǵan. Sondaı-aq júrip turý múmkindigi shektelgen balalarǵa arnalǵan balashaǵa sol mekemede jumys isteıtin qyzmetkerlerdiń 4 balasy baryp júrgen. Bul týraly Astana qalasynyń prokýratýrasynyń baspasóz qyzmetinen habarlady.
Búginde Astanada múgedek balalar úshin arnaıy bilim beretin 32 bilim mekeme men 22 densaýlyq saqtaý uıymdary jumys isteıdi. Prokýrorlyq tekseris kezinde balalarǵa áleýmettik-medıtsınalyq pedagogıkalyq qoldaý kórsetýge arnalǵan uıymdardyń jumysyndaǵy problemalar men kemshilikterdiń oryn alǵandyǵyn kórsetti.
«Qaladaǵy 3 PMPK-nyń bir de bireýinde jeke úı-jaıy, materıaldyq bazasy nashar,balalardy tekserýge alyp baratyn kólikter joq. Barlyq 3 PMPK-da, 2 ońaltý ortalyǵynda jáne birqatar bilim berý mekemelerinde bólmeleriniń sanıtarlyq normalarǵa sáıkes kelmeý sebepterinen medetsınalyq qyzmet kórsetýge memlekettik lıtsenzııa berilmegen. Balalarmen jumys isteý úshin bilikti mamandardyń, atap aıtqanda sýrdologtar, logoped, tıflo jáne sýrdopedagogtardyń tapshylyǵy máselesi órship tur. Astana boıynsha jalǵyz jalpy orta bilim berý arnaıy mekemesi - kemtar balalarǵa arnalǵan arnaıy túzetý mektep ınternaty balalardyń oqýymen turýyna tolyq jaǵdaı jasalynbaǵan ǵımaratta ornalasqan» delingen habarlamada.
Buǵan qosa, prokýrorlar tekseris barysynda múgedek balalarǵa arnalǵan arnaıy uıymdarǵa qabyldaýdyń tártibin retteıtin zańnama talaptarynyń saqtalmaı otyrǵanyn anyqtady.
«PMPK-nyń joldamasy men kemistigi joq 36 bala (balabaqsha qyzmetkerleriniń balalary) kózderi nashar kóretin balalar baqshasyna qabyldanǵan, júrip turý múmkindigi shektelgen balalarǵa arnalǵan balabaqshaǵa qyzmetkerlerdiń 4 deni saý balasy baryp júrgendigi málim boldy. Osyǵan oraı, prokýrorlyq tekseristiń qorytyndysy boıynsha 38 prokýrorlyq qadaǵalaý aktileri sonyń ishinde 23 usynys, 5 narazylyq, engizilip ,10 ákimshilik is qozǵalyp, 30 tulǵa jaýapkershilikke tartyldy» delingen baspasóz málimdemesinde.
