Astanada kemirgishter sanyn retteý jumystary júrgizilip jatyr: turǵyndar neni bilýi kerek
ASTANA. KAZINFORM – Elordanyń barlyq aýdanynda qala ortasyndaǵy kemirgishterdiń sanyn retteý maqsatynda josparly deratızatsııalyq sharalar júrgizilip jatyr. Qorshaǵan ortany qorǵaý jáne tabıǵatty paıdalaný basqarmasynyń mamandary Telman turǵyn alabynyń turǵyndarymen kezdesip, tıisti preparattardy qoldaný boıynsha jumystar týraly aıtyp ótti, dep habarlaıdy qala ákimdiginiń resmı saıty.
Deratızatsııa jumystarynyń birinshi kezeńi 15 naýryzda bastalyp, 15 sáýirge deıin jalǵasady. Bul kezeńde negizinen turǵyn alaptary óńdeledi. Sonymen qatar bekitilgen aýmaqtarda jumystardy múliktiń menshik ıeleri birlestigi (MIB/PIK) jáne shaǵyn, orta bıznes ókilderi júrgizedi.
Qalanyń barlyq sýbektileriniń qatysýy deratızatsııanyń tıimdiligi úshin mańyzdy sanalady. Sondyqtan MIB/PIK pen kásipkerler tıisti jumystardy 15 sáýirge deıin aıaqtaýy qajet.
Ekinshi kezeń 15 sáýirden 15 mamyrǵa deıin sozylady. Bul kezeńde ashyq aýmaqtar – parkter, skverler, jaǵalaýlar jáne basqa da qoǵamdyq keńistikter óńdeledi. Jalpy óńdeletin aýmaq kólemi shamamen 8 myń gektardy quraıdy.
Mamandardyń aıtýynsha, kemirgishter ekojúıeniń quramdas bóligi bolǵanymen, olardyń sanyn qaýipsiz ádistermen retteý qajet. Turǵyndardan ótinishter kóbinese kóktem men kúzde, ıaǵnı janýarlardyń maýsymdyq belsendiligi kezinde túsedi. Kóktemde kemirgishter óz inderinen shyǵyp, kúzde qaıta oralady.
Ótinishterdiń basym bóligi qurylys qarqyndy júrip jatqan aýdandardan keledi. Jańa aýmaqtardy ıgerý kezinde kemirgishterdiń tabıǵı meken etý ortasy buzylyp, olar turǵyn aımaqtarǵa jaqyndaıdy.
Aǵymdaǵy naýqan aıasynda shamamen 28 myń jeke úı aýmaǵynda deratızatsııa jumystary júrgiziledi. Sonymen qatar, ashyq aýmaqtarda arnaıy kedergilik aımaqtar ornatylady.
Múliktiń menshik ıeleri birlestikterimen ózara árekettesýge erekshe nazar aýdarylady. Qalada deratızatsııa qyzmetin kórsetetin 29 lıtsenzııalanǵan kompanııa bar. Basqarma aýdan ákimdikterimen birlesip túsindirý jumystaryn uıymdastyryp, kelisimsharttardyń osy uıymdarmen jasalýyn jáne maýsymdyq óńdeý merzimderiniń saqtalýyn talap etedi.
Kópqabatty turǵyn úılerde jaǵdaı bólek qarastyrylady. Turǵyndar kemirgishterdiń paıda bolýyn kóbine qoqys alańdarymen baılanystyrady. Mamandar konteıner alańdarynyń taralý kózi emes ekenin, olar tek azyqtaný orny ekenin, al negizgi oshaqtardyń – jertóle men inderiniń ornalasqan jeri ekenin túsindiredi.
Sondyqtan deratızatsııa keshendi túrde júrgizilýi tıis: qoqysty turaqty shyǵarý, jertóleler men qosa ornalasqan aýmaqtardy óńdeý, sondaı-aq kommýnaldyq qyzmetter men MIB arasyndaǵy úılestirý qajet.
Qorshaǵan ortany qorǵaý basqarmasynyń veterınarııa jáne fıtosanıtarııa bóliminiń basshysy Azat Turapbaevtyń aıtýynsha, júıeli tásil men birlesken jumys kemirgishterdiń sanyn tıimdi baqylaýǵa alyp, qalanyń sanıtarlyq jaǵdaıyn jaqsartýǵa múmkindik beredi.
Eske sala keteıik, buǵan deıin elordada kemirgishterge qarsy kóktemgi kúres naýqany bastalǵanyn jazǵan edik.
