Astanada «Kemel jigit — kúıeý bala» ulttyq zııatkerlik kýrsy ashyldy
ASTANA. KAZINFORM — Búgin «Báıterek» monýmentiniń alańynda «Kemel jigit-kúıeý bala» Ulttyq zııatkerlik kýrsynyń saltanatty ashylý rásimi ótti. Іs-sharany Astana qalasy ákimdiginiń Din isteri jónindegi basqarmasy jáne Dinderdi zertteý ortalyǵymen birlesip uıymdastyrdy.
— «Kemel jigit — kúıeý bala» zııatkerlik kýrsyna qatysyp jatqan jastarǵa egemendi elimizdiń jastardyń rýhanı, ǵylymı, mádenı damýyna memleket tarapynan kóp qoldaý bildirip jatyr. Jastardy otansúıgishtik pen aýyzbirshilikke, el tarıhy men mádenıetin umytpaýǵa, úlkenderdi qurmettep, kishilerge izet bildirýge úndeımin, — dedi Astana qalasy máslıhatynyń tóraǵasy — Kanalımov Erlan Ermekuly.
Ekinshi sóz kezegi «Yryskeldi qajy» meshitiniń bas ımamy — Asanov Nurlan Baıjigitulyna berildi.
—Zııatkerlik kýrstyń ataýynyń ózi mańyzdy. Árbir jas — bolashaq áke men bolashaq ana. Halqymyzdyń san túrli salt dástúrleriniń qundylyqtaryn umytpaý kerek. Imandylyqty boıymyzǵa sińirýden bólek, tánimizdi shynyqtyrý arqyly kemeldikke qol jetkizýge bolady. Búgingi saparǵa shyqqaly otyrǵandarǵa aq jol tileımin, — dedi Bas ımam.
Sóz sońyn ata-ana qaýymynan Sámek Nurlybek esimdi azamat aıaqtap, osyndaı sharalardyń ótkizilip jatqanyna rızashylyǵyn bildirip, el aǵalary men uıymdastyrýshylarǵa alǵysyn aıtty.
Aıta ketý kerek, «Kemel jigit-kúıeý bala» Ulttyq zııatkerlik kýrsy «Býrabaı» ulttyq parkiniń aýmaǵyndaǵy «Jeti qazyna» etno aýylynda eki kún boıy ótedi. Bul kýrstyń maqsaty — jastar arasyndaǵy ulttyq qundylyqtar men tarıhı sanany jańǵyrtý, qazaq bolmysy men dástúrlerin dáripteý.
Іs-sharaǵa 60 bala qatysty. Kýrs barysynda teorııalyq jáne praktıkalyq sabaqtar ótkiziledi. Teorııalyq sabaqtar «Qazaq tarıhy men dástúrleri», «maqal-mátelderdegi ulttyq tárbıe», «jigitiń úsh jurty» baǵyttaryn qamtıdy. Praktıkalyq sabaqtar jasóspirimderge mal soıý, ony jilikteý, tuzdaý, úıitý ádistemesi, et týraý, tabaq tartý, jylqy janýarynyń qasıetteri, at ábzelderimen tanysý, atqa miný jáne sadaq atý jáne t. b. sııaqty dástúrli daǵdylardy tárbıeleýge arnalǵan.
Kýrs barysynda balalarynyń ónerin tamashalaýǵa kelgen ata-analaryna da ulttyq qundylyqtarǵa negizdelgen tanymdyq dárister men «Kásipkerlik negizderi», «Jasóspirim balalar men ata-analardyń qarym-qatynasy» taqyryptarynda semınar-trenıngter uıymdastyrylady.
