Astanada kembaǵal jandar arasynda bıden Qazaqstan chempıonaty ótýde
ASTANA. QazAqparat - Astanada Táýelsizdik saraıynda múmkindigi shekteýli jandar arasynda qolarbada otyryp bıleýden Qazaqstan Respýblıkasynyń chempıonaty ótýde.
Oǵan Taraz, Atyraý, Qaraǵandy, Shymkent jáne Astana qalalarynan barlyǵy 39 sportshy qatysýda. Shara jeńimpazdaryna beriletin syıaqy qorynyń jalpy kólemi 1 mıllıon teńgeni qurap otyr. Búgin, 13 sáýirde fınaldyq saıystardan keıin jeńimpazdar anyqtalady.
«Qazaqstanda qolarbada otyryp bı bıleý sporty Qazaqstanda jaqynda ǵana paıda boldy, alaıda atalmysh sportpen aınalysyp júrgen adamdar eleýli jetistikterge qol jetkizýde. Olardyń ishinen Tokıoda ІRS álem chempıonatyndaǵy qola júldeni erekshe atap ótken jón. Qazaqstandyq múgedek sportshylar atalmysh saıysqa birinshi ret qatysty. Qazaqstanda arbada otyryp bı bıleý sporty qaryshtap keledi», - deıdi Qazirgi zamanǵy sporttyq bı federatsııasynyń prezıdenti Álııa Túsipbekova.
Onyń aıtýynsha, qolarbada otyryp bı bıleýdi Paralımpıada oıyndaryna engizý boıynsha jumystar atqarylýda. Álem chempıonatyndaǵy jeńisten keıin bizdiń sportshylar 2016 jylǵy Brazılııada ótetin Paralımpıada oıyndaryna baryp qalýy bek múmkin.
Arbada bı bıleý sporttyq bı retinde 2009 jyldan bastap damyp keledi. Buǵan deıin ol kórkemónerdiń bir túri bolyp qarastyrylyp kelgen. 2010 jyly astanalyq «Qaısar» klýbynda sporttyq bı bólimi ashylyp, Astana mundaı sportpen aınalysatyn bıshilerdi daıyndaıtyn alǵashqy qala atandy.
