Astanada kelissóz ótkizgen Erdoǵan Pýtındi Túrkııaǵa shaqyrdy
ASTANA. KAZINFORM — Túrkııa Prezıdenti Rejep Taııp Erdoǵan Astanada Reseı Prezıdenti Vladımır Pýtınmen kelissóz júrgizdi. Bul jaıynda Anadoly agenttiginen habarlandy.
Shanhaı Yntymaqtastyǵy Uıymynyń 24-shi sammıtine qatysýǵa Astanaǵa kelgen qos eldiń prezıdentteri Túrkııanyń Sınop qalasynda taǵy bir atom elektr stansasy jobasyn iske asyrý múmkindigin talqylady. Erdoǵannyń aıtýynsha, Túrkııa men Reseı arasyndaǵy saýda aınalymy kólemin 100 mlrd dollarǵa jetkizý kózdelgen.
«Men bul mejege jaqyn ýaqytta jetetinimizge senemin. Bizde oǵan qajet áleýet tolyq bar», — dep atap ótti Rejep Taııp Erdoǵan.
Sóz sońynda túrik kóshbasshysy Vladımır Pýtındi taıaý arada Túrkııaǵa saparlap kelýge shaqyrdy.
Eske sala keteıik, Rejep Taııp Erdoǵan ShYU sammıtine qatysý úshin Astanaǵa búgin ushyp keldi.
