Astanada kelesi jyly joǵary synyp oqýshylaryn kásiptik daıarlaýǵa baǵyttalǵan joba iske qosylady
ASTANA. QazAqparat - Astanada Memleket basshysynyń «Qazaqstan jańa jahandyq naqty ahýalda: ósim, reformalar, damý» taqyrybyndaǵy halyqqa Joldaýyn iske asyrý boıynsha óńirlik is-sharalar jospary qabyldanady. Bul týraly qala aktıviniń keńesinde elorda ákimi Ádilbek Jaqsybekov málim etti, dep habarlaıdy qalalyq ákimdiktiń baspasóz qyzmetinen.
«Qyzmetimizge baılanysty bárimiz de Joldaýdyń basty oryndaýshylary bolyp tabylamyz. Memleket basshysy aıtqan árbir tarmaq múltiksiz oryndalýǵa tıis», dep atap ótti Astana ákimi barlyq qalalyq memlekettik organdarǵa qaratyp aıtqan sózinde.
Á.Jaqsybekov Joldaýdy iske asyrý barysyndaǵy basty baǵyttardy aıqyndap berdi. Bıýdjettik saıasatty ońtaılandyrý maqsatynda bıýdjettik baǵdarlamalardyń barlyǵyna revızııa júrgiziledi. Tıimsiz jáne «formaldy» shyǵyndar alynyp tastalady. Bul rette bıýdjettiń kiris bóligin ulǵaıtýǵa jáne salyqtyq ákimshilendirýdiń tıimdiligin arttyrýǵa erekshe nazar aýdarylmaq. Básekeles ortaǵa berýdi qajet etetin birqatar memlekettik uıymdar men nysandar bar. Jańa ınvestıtsııalyq saıasat aıasynda Astanada qalalyq jobalardy iske asyrý úshin Investıtsııalar tartý keńesi qurylatyn bolady. Osylaısha, elordanyń ınvestıtsııalyq tartymdylyǵyn arttyrý boıynsha jumystar jalǵasyn tabady. Qala basshysy memlekettik-jeke menshik áriptestikti keńeıtýge, mysaly, áleýmettik sala nysandaryn - emhanalardy, aýrýhanalar men balabaqshalardy senimdi basqarýǵa berý máselesine erekshe toqtaldy. «Bıýdjetke túsetin salmaqty azaıtatyn jáne halyqqa usynylatyn qyzmetter tizimin keńeıtý men sapanyń artýyna ákeletin bastamalardy qoldaý kerek», - dedi Á. Jaqsybekov. Astanada bıznes úshin ákimshilik tosqaýyldardy azaıtý boıynsha jumystardy kúsheıtý kerek. Búginde kóshede saýda jasaýǵa arnalǵan oryndar berilýde, bul ShOB ókilderine odan ári damýǵa kómektesedi. Innovatsııalyq ındýstrııalandyrý aıasynda jańa jobalardy iske asyrý ǵylymdy qajetsiný jáne ekonomıkalyq tıimdilik krıterıılerine qatań sáıkes bolýy kerek. Aıta keteıik, qazirgi kezde №1 Indýstrıaldyq park jemisti jumys istep keledi, onda 23 ınvestıtsııalyq joba paıdalanýǵa berildi, №2 Indýstrıaldyq parki boıynsha sheberlik jospardy ázirleý aıaqtalýǵa jaqyn. Bul ınvestıtsııalardy tartyp qana qoımaı, jańa jumys oryndaryn ashýǵa da múmkindik beredi. Memleket óziniń áleýmettik mindettemelerin tolyq dárejede oryndaýda, bul rette halyqty jumyspen qamtý úshin jaǵdaı jasaıdy. Búginde Astanada memleket boıynsha eń tómen jumyssyzdyq deńgeıi tirkeldi (4,6%), osy baǵyttaǵy tıisti jumystar belsendi túrde jalǵasady. Á.Jaqsybekov jumys oryndaryn qurýdy qala ákimdiginiń strategııalyq mindeti retinde belgiledi. Elordalyq Jumyspen qamtý ortalyǵy halyqty, ásirese, jastardy jumyspen qamtý jáne qaıta oqytý boıynsha úlken jumys atqarýda. Kadrlardy daıarlaýdaǵy mańyzdy baǵyttardyń biri tehnıkalyq jáne kásiptik bilim berýdi damytý bolyp tabylady. Aldaǵy ýaqytta tehnıkalyq kadrlardy daıyndaý boıynsha ozyq ortalyq qurý máselesi qaralady. Keler jyldyń qańtar aıynan bastap Astanada joǵary synyp oqýshylaryn kásiptik daıarlaýdy uıymdastyrýǵa baǵyttalǵan joba iske qosylady. Keńesti qorytyndylaı kele, Á.Jaqsybekov júrgiziletin jumystardyń sapasyna basa nazar aýdardy. «Barlyq praktıkalyq sheshimder Joldaýda aıtyldy. Eshteńeni oıdan alýdyń qajeti joq. Tek naqty nátıjeler beretin oılastyrylǵan batyl sharalar ǵana kerek», - dedi Astana ákimi.
